Maiddái dán jagi bovdet bivnnuhis ja muossedis yurtakonsearttaide Riddu Riđus. Yurtta baskkádasas besset guldaleaddjit lahka musihka ja dáiddára – áibbas erenoamáš festiválavásáhus maid oallugat lohket leat okta buoremus vásáhusain festiválas.   

Dán yurtakonseartta doallá mongolalaš musihkar Nasanjargal «Nasaa» Ganbold. Nasaa lea riikkaidgaskasaččat beaggán árbevirolaš mongolalaš čottalávlumiin (khöömii ja kharkhiraa) ja čuojaha ollu instrumeanttaid, earet eará  morin khuura (heastaoaivefidjola), bishguura ja tovshuura. 

Fámolaš jietnateknihkaiguin, árbevirolaš čuojanasaiguin ja persovnnalaš muitalusaiguin bovde Nasaa guldaleddjiid jietnaduovdagii gos dološ ja dálá áiggit gávnnadit. Dát šaddá sierralágán konseartavásáhus maid it háliit manahit.  

Leat ráddjejuvvon sajit ja yurta dievvá johtilit – dása ferte árrat leat jođus!