Dieđut

Festiválapássain beasat oassálastit buot lágidemiin, muhto muhtimiidda fertet dieđihit ovddalgihtii: 

Mánáidfestivála - OZA DÁS

Nuoraidprográmma - OZA DÁS

Yurtakonsearttaide, deadjaseremoniijaide, filmmaide, semináraide ja čájáhusaide ii dárbbat várret sierra bileahtaid jus eará ii leat dieđihuvvon, muhto boađe buori áiggis vai oaččut saji.

Davvi álbmogiid guovddáža geallirgearddis lea vejolašvuohta riššudit. 

• Gaskavahku - lávvordaga: bie. 10:00-13:00 ja 17:00-21:00.
• Sotnabeaivvi: bie. 10:00-14:00. 

Riššubileahtta máksá 20 kr/Vipps. Muitte fal ruđa váldit mielde.

Festiválabáikkis lea vejolašvuohta oastit biepmu eanáš áigge jándoris. Vuollin 2 km geahčen Lávkgiettis leat guokte gávppi.

Dušše sii geain lea festiválagiehtabáddi besset sisa festiválabáikái. Dát guoská gait beivviide earret gaskavahku veaiggi. Giehtabáddi lea persovnnalaš, ja dan oažžu go oastá beaivelihpu, vahkkoloahpapássa dehe festiválapássa.

• Festiválabáikái bie. 24.00 rájes: 15 jagi ahkerádji
• Háše duohken bára: 18 jagi ahkerádji
• Festiválaorohahkii: 18 jagi ahkerádji
• Bearašorohahkii: ii leat ahkerádji

Festiválas sáhtát máksit sihke koarttain ja ruđain.  

Rullastuollogeavaheddjiid mii ávžžuhit váldit mielde mieđušteaddji dasgo rullastuoluin sáhttá leat váttis johttit festiválaguovllus. Suohkanlaš mieđušteaddjiduođaštus dohkkehuvvo. Davviálbmogiid guovddážis leat doaibmahehttejuvvon olbmuide heivehuvvon hivssegat.

Festiválii ii leat lohpi váldit mielde elliid/viessoelliid.

Riddu Riđđu Festivála háliida fátmmastit buohkaid ja dahkat nu ahte buohkat sáhttet leat doppe! Mii háliidat dagahit nu ahte eambbosat sáhttet searvat kulturdoaluide ja nu leat mielde buoridit olbmuid eallinárvvu beroškeahttá fysalaš gáržžádusain.

Mieđušteaddjiduođaštus: Mii dohkkehat mieđušteaddjiduođaštusa. Čájet mieđušteaddjiduođaštusa bileahttaluŋkkás go boađát festiválii. 

Eaktodáhtolaš bargit: Jus dus lea vuoliduvvon doaibmannákca de sáhtát lihkká veahkehit min lágidit festivála! Muital min eaktodáhtolašjođiheaddjái iežat dárbbuid birra ja de heivehat mii du eaktodáhtolaš-fávtta nu bures go nagodat.

HC-biilabisánansadji: Lahka festiválaguovllu verráha leat mis várrejuvvon biilabisánansajit olbmuide geain lea doaimmashehttejupmi. Atte dieđu e-poastta bokte, [email protected], buori áiggis ovdal festivála jus dárbbašat biilabisánansaji.

Biebmu ja allergiija: Doppe gos biebmu guossohuvvo lea maiddái fállu gávdnamis gos leat dieđut biepmuid ja vejolaš allergenaid birra.

Beasatlašvuohta festiválaguovllus:

Eanaš oassi festiválas lágiduvvo olgun, nu ahte sáhttá leat hástaleaddji beassat juohke sadjái festiválaguovllus. Lea sierra geaidnu festiválaguvlui, muhto leat ollu oasit prográmmas mat leat giettis gos sáhttá leat juggái. Dálki maid sáhttá váikkuhit beasatlašvuhtii.

Váldolávdi: Dađibahábut de ii leat mis sierra stealli juvlastuollogeavaheddjiide justa dál. Sáhttet leat ollu geahččit lávddi ovddabealde, mii ávžžuhat sin geain leat lihkadanhástalusat leat ravddain vai ožžot buori konseartavásáhusa. Boađe buori áiggis ovdal konsearttat álget vai fidnet buori saji. Jus it nákce čuožžut guhká, de ávžžuhuvvo ahte válddát mielde juoga man alde sáhtát čohkkát. 

Mánáidfestivála: Mii háliidat ahte buot mánát galget sáhttit searvat min mánáidfestiválii! Vai sáhttit láhčit nu buori vásáhusa go vejolaš, lea buorre jus buori áiggis ovdal festivála oažžut dieđu jus ja mo du mánnái ferte láhččojuvvot. Sádde e-poastta: [email protected]

Lávddáš: Lávddáža buohta lea juggái, ja ávžžuhuvvo ahte juvlastuollogeavaheddjiin lea mieđusteaddji mielde.

Girjerádju: Eai leat ceahkit ja lasát maid badjel ferte ovdal beassá lanjaide, lea álki dohko beassat. Doppe lea HC-hivsset.

Kultursála: Álki beassat. Buorre beasatlašvuohta arenas. HC-hivsset hui lahka. Dáppe sáhttá geavahit telegierddu go dat ovddalgihtii lea jerrojuvvon. Sádde e-poastta: [email protected]

Riddu Siida: Siiddas lea juggái, ja ávžžuhuvvo ahte juvlastuollogeavaheddjiin lea mieđusteaddji mielde. Juvlastuollogeavaheddjiide ii leat álki beassat daid iešguđetge visttiide dán guovllus.

Nisga’a viessu: Olgeš bealde lea stealli man mielde beassá sisa. Leat veahá gáržžes lanjat. Doppe lea HC-hivsset.

Baldalávvu: Váttis beassat dohko juvlastuoluin. Doppe ii leat HC-hivsset.

Vuollabáiki: Váttis beassat juvlastuoluin, go dohko lea vuostálat. Go áigu oastit juhkamuša de ferte vuos oastit oastinlihpuid mat vuvdojuvvojit das lahka. Ávžžuhuvvo ahte juvlastuollogeavaheddjiin lea mieđušteaddji mielde deike. 

Davvi álbmogiid guovddáš: Buorre beasatlašvuohta juvlastuoluin. HC-hivsset. Heaisa vuolitgeardái gos leat seminárat/dáiddačájáhusat.

Camp 18 + / bearašcamp: Váttis beassat juvlastuoluin, lea gieddi ja sáhttá leat juggái. Dađibahábut de ii leat HC-hivsset dáppe. 

Bileahttaluŋká: Álki beassat. Beavdi gos galgá máksit lea veahá allat.

Biebmoguossoheapmi: Lea stealli man mielde beassá dohko gos biepmu diŋgojuvvo ja máksojuvvo.

Kioska: Álki beassat. Beavdi gos galgá máksit lea veahá allat.

HC-hivsset: Guovllus lea sierra HC-hivsset.

Leatgo dus jearaldagat? Sádde e-poastta: [email protected]

Giehtabáddi

Leat dušše sii geain lea festiválagiehtabáddi geat besset festiválaguvlui. Dát guoská buot beivviid, earret gaskavahkku. Lea nuvttá fitnat min márkaniin duorastaga, bearjadaga ja lávvardaga dassá diibmu lea 18:00.

Eallit - stohpoeallit

Ii leat lohpi váldit mielde elliid/stohpoelliid festiválaguvlui, iige festiválacampii. Bearašcampii lea lohpi váldit mielde stohpoelliid. Ávžžuhuvvo ahte válddát vuhtii eará gussiid geat leat orrumin bearašcampas, ja mii eaktudat ahte elliin lea buorredilli vaikke don leat festiválas!

Čáhci

Ii ávžžuhuvvo juhkat čázi jogas, sáhttá leat nuoskkiduvvon. Mis leat máŋga čáhcestašuvnna guovllus- váldde fárrui bohtala man sáhtát deavdit buhtes čáziin- áibbas nuvttá!

Riddu Riđđu Festivála lei okta dain vuosttaš festiválain Norggas mii sertifiserejuvvui birasčuovgadoardnan (2004). Dál leat sertifiserejuvvon ođđasit ja leat bidjan mihttun šaddat Norgga buoremus festivála birrasa dáfus- ja mii sávvat ahte DON sáhtát veahkehit min dainna.

Min birasjulggaštus:

"Riddu Riđđu Festiválas lea mihttun leat okta dain eanemus birasseasti festiválain Norggas. Mii galgat váldit ovddasvástádusa birrajagi mo min doaibma váikkuha birrasii báikkálaččat, nationálalaččat ja riikkaidgaskasaččat. Mii galgat bargat joatkevaččat buoridit iežamet birasáŋgiruššama, ja biras galgá álo leat guovddážis sisaoastimiid, buvttadeami ja doapparhálddašeami oktavuođas. Riddu Riđđu Festivála galgá doahttalit buot DBS/HMS-gáibádusaid mat bohtet eiseválddiin.

Olles festiválas lea fokus birrasii ja hálddahus čuovvulahttá dan jeavddalaččat mihtuid, plánaid ja raporteremiid bokte. Min birasbarggut galget movttiidahttit eará lágideddjiid, ovddasbargoguimmiid ja min gussiid. Mii galgat dahkat dán álkes doaibmabijuiguin nu ahte juohkehaš sáhttá searvat áŋgiruššamii. Miehtá jagi galgat mii leat buorrin ovdagovvan min kantuvrasearvevuođas, mii sirret ruskkaid, geavahat nu unnán báhpára go vejolaš, mis lea buorre DBS/HMS-profiila ja oastit nu unnán dárbbašmeahttun gálvvuid go vejolaš."

Mii háliidat čájehit servodatovddasvástádusa dan bokte ahte leat dihtomielalaččat mo festivála váikkuha olbmuide, báikegottiide ja birrasii. Mii buoridat festivála ruskasirrema juohke jagi ja mii oastit eanet ahte eanet birassertifiserejuvvon gálvvuid. Go lea vejolaš de gávppašat báikkálaččat, ja geavahat biepmuid mat bohtet lagašguovlluin nu ollu go lea vejolaš. Festiválaguossit ávžžuhuvvojit sirret iežaset ruskkaid ja geavahit kollektiivasáhtuid dahje mátkkoštit searválagaid biillaiguin festiválii. Mis lea birasdiva biilabisánansajis. Buot bargit, nuoraidbargit ja eaktodáhtolaččat ožžot máhcastankohpa mainna fidnejit nuvttá káfe. Máhcastankohpat leat ráhkaduvvon sohkarrevrriin.

Festiválaguossit sáhttet oastit termoskohpaid mat leat bámbbus ráhkaduvvon, dainna fidnejit nuvttá káfe festiválas. Dát doaibmabidju lea biddjon johtui garvin dihte báberkohpageavaheami. Mii eat vuovdde bohtalčázi ja mis lea buhtes, nuvttá čáhci buot min čáhcepoasttain. Deavdde iežat bohtala dahje oastte Riddu Riđđu bohtala min buvddas!

Mii eat vuovdde Coca-Cola festiválas. Lea dihtomielalaš mearrádus cuiggodit ahte Coca-Cola Company privatisere čázi, ja mo dat áitá eamiálbmogiid vejolašvuođa buhtes juhkančáhcái. Festiválagussiide guossohuvvo biebmu lihtiin mat leat ráhkaduvvon pálbmalasttain, ja boradanneavvuin main sáhttá 100% komposteret. Geavahuvvojit maiddá dušše ovttahávášdávvirat maid sáhttá komposteret go bargit ja eaktodáhtolaččat guossohuvvojit. Bargiid niesttit eai páhkkejuvvo plastihka sisa, muhto báberbussiide. Birasseasti oanehissoajatbáiddit ja báiddit leat maiddái vuovdimassii buvddas. Ale geavat ovttahávášgrilla go kohkket. Lea lohpi dolastallat buot gohttenbáikkiin nu guhká go jurddašat iežat ja ránnjáid sihkkarvuođa birra!

Mis leat diehtojuohkingalbbat maid geavahat juohke jagi, ja mii garvit čáliheamis báhpáriid. Mii leat ásahan festiválaguovddáža mii galgá eastadit ahte divrras ja dehálaš dávvirat jávket.

Go plánet artisttaid ja gussiid sáhtostallama bures de eat dárbbaš vuodjit Romssa ja Olmmáivákki gaskka nu dávjá. Festiválas lea buorre ovttasbargu Avfallsservice AS:in, mii veahkeha gelbbolašvuođainis mo galgat gieđahallat ruskkaid festiválas ja festivála maŋŋá. 2019:s lei Luonddugáhttensearvi festiválas kárten dihte min birasbarggu festiválas. Sis ledje iežaset birasbargit festiválas geat juhke dieđuid festiválagussiide ruskagieđahallama birra.

Dasa lassin lea Riddu Riđđu miellahttun Visit Lyngenfjordas mii lea sertifiserejuvvon ceavzilis mátkebáikin. Loga eanet ortnega birra dáppe.