Installašuvdna Dan botta go vuorddašat soabadeami lea reakšuvdna Norgga duohtavuođa- ja soabahanprosessii mii orro bisánan. Dat gáibida guoktása dahje eambbosiid soabahit, muhto dát installašuvdna fállá ovttaskas olbmuide jeđđejeaddji báikki. Dáppe sáhttá okto smiehtadišgoahtit iežas bákčasiid ja vásáhusaid birra, ja dáinna lágiin álggahit soabaheami. 

Guolga lea guovddáš ávnnas dáidagis, ja govahallá sihke lieggasa, feminitehta, fuola ja muhtimin hástaleaddji elliidčálggu, seammás go sápmelaččaide lea bivdu ja boazodoallu guovddážis. Náhkit ja duoljit leat leamaš dehálaš sámi gálvvut máŋga duhát jagi ja guovddážis árktalaš eamiálbmogiid birgejumis. 

Dáiddár Susanna Hætta ráhkadii dáidaga Dáiddadálu 10-jagi ávvudeapmái, ja Riddu Riđđui rievdada olggoža Dan botta go vuorddašat soabadeami čalmmustahttin dihte ahte juohkehaš ferte soabahit iežas dáruiduhttin vásáhusaiguin. 

Dorjon leat: Dáiddadállu, Bergesenstiftelsen og Samiske Kunstneres og Forfatteres Vederlagsfond.