Mii leat ilus go beassat vuostáiváldit bálkkašuvvon artistta Aysanabee, gii boahtá vuosttaš geardde Riddu-guolbanii 2025:s.

Aysanabee lea multi-instrumentalista, buvttadeaddji ja lávllačálli, gii lea beaggán erenoamáš ja fámolaš jienainis. Čábbát ovttastahtton indie-, soul- ja elektrovnnalaš jienaiguin hábme hypnotiserejeaddji ja šuoŋalaš jietnamáilmmi. Son lea Oji-Cree, Sandy Lake First Nationa Sucker Klanas, ja musihka bokte juohká son persovnnalaš eallinvásáhusaid, muitalusaid ja buolvvaid traumaid.

Oanehis áiggis lea Aysanabee ásahan iežas dovddus artistan ja dahkan historjjá go šattai vuosttaš eamiálbmotartista gii vuittii JUNO bálkkašumiid, namalassii jagi alternatiiva skearru ja jagi lávllačálli 2024:s, rámiduvvon Here and Now skearruin.

Aysanabee lea čuojahan badjel 300 konseartta stuora lávddiin, festiválain ja čuojahanbáikkiin miehtá Kanada ja iežá riikkain. Dál lea son stuora turneas mas maiddái Riddu Riđđu váldolávdi lea fátmmastuvvon.

Vásihit su ja su jiena lávdde nalde lea juoga maid it hálit manahit - mii lohpidit, dát manná sivuid čađa Riddu-guolbanis!

Riddu Riđđu festiválas boahtá son váldolávdái oktan ovddasteaddjin Dán jagi davviálbmogis, mii lea nêhiyawak (cree).