Mii leat viimmat virkkosmuvvan maŋŋel dan neavgalaga feasta maid sii dagahedje maŋemus go ledje dáppe, ja mii leat hui rámis ja ilus go sáhttit muitalit ahte Intrigue galgá Riddu-guolbanii fas, vuosttaš geardde jagi 2002 rájes!

  Heavy metal-máinnalmasat Intrigues leat doallan eallima 1989 rájes ja buktet ain mielahis liveshowiid.  

Ovdavázzin iežas šáŋŋeris, Heavy Joikas, ii leat Intrigue goassege beroštan trendain iige dárbbašmeahttun ođasmahttimiin, baicca álo leamašan oskkáldas iežas musihkalaš hápmái, nannosit čadnon klassihkalaš Heavy Metal-soundei. Dat lea addán jovkui sihke rámi, gudni ja golleskearruid. Intrigue lea earet eará vuoitán Áillohačča musihkkabálkkašumi ja Kárášjoga gieldda kulturbálkkašumi, ja čuojahan lohkameahttun olu konsearttaid stuorát ja unnit lávddiin sihke sis- ja olgoriikkas.  

Joavkkus leat odne Kai Somby lávlun, Tore Skoglund ja Geir Karikoski gitáraiguin, Frank Rasmus bássain ja Øyvind Karlsen rumbbuiguin. 

Dál ii leat eará go ohcalit partygávtti ja biikaboahkána, oainnat go dán geasi galgat mii časkit dakkár feasta dego livččii 2002!