Binnáš vel! ovdandivvu dutnje oanehisfilbmačohkkehusa mii čalmmustahttá eamiálbmogiid oktavuođa eatnamii ja čáhcái.

Dát filbmaprográmma lea oassin galleriija vuosehusas. Čájálmas bistá 30 min ja lea Nisga’a-viesus. Bileahtaid ii várre ovdagihtii.
 

Geaidnoearus / Ved Veiskillet
Sápmi/Norga, 2022, 15 min. Dokumentára.
Bagadallan/giehtačálus: Elina Waage Mikalsen ja Magnus Holmen
Giella: Dárogiella, tekstejuvvon eŋgelasgillii

Roadtripa Riehpavuonas, mii muitala minerálaroggamis ja oktiigullevašvuođas. Ovdal nuoskiduvvon vuona birra, mii hiljit ealáska fas. Vuostálasvuođaid eanadat ja guovddáš gižžui mas sámi vuoigatvuođat ja luonddugáhtten deaivvadit ovttain norgga eavttuin. 

Riehpavuotna, mii lea Romssas ja Finnmárkkus Davvi-Norggas, lea áitatvuloš maŋŋelgo Norgga ráđđehus dohkkehii plánaid atnin vuona deponiijan ruvkebázahusaide. Vuotna lea našuvnnalaš luossavuotna, gos riddodorskiin leat gođđinbáikkit ja mii lea dehálaš resursa guovllu sámi boazodollui.  

Elina Waage Mikalsen ja Magnus Holmen (r. 1992 ja 1991) orruba ja bargaba Oslos. Waage Mikalsena dáiddalaš barggu vuolggasadjin lea dávjá su sámi/dáčča duogáš, mas Norgga assimilerema ráiggit rivdet bálggisin ođđa muitalusaide. Holmen bargá lihkadeaddji govaiguin ja lea maiddái oassin HÆRK nammasaš kuráhtorkollektiivvas. Sihke filbma- ja dáiddaoahppoduogážiinniska bargaba dáiddárat ovttas gárget mohkkás gažaldagaid gullevaččat identitehttii ja duovdagii, gáržžiduvvon muitalusaid ja sámi geahččanguovlluid luondduroasuid áiggis. 

In the Shadow of the Tugtupite

Kalaallit Nunaat, 2020, 6 min. Dokumentára.
Bagadallan/giehtačálus: Inuk Jørgensen
Giella: Ruonáeatnangiella, tekstejuvvon eŋgelasgillii

Poehtalaš oanehisdokumentára mii jearrá jearaldagaid ovddešáigge ja boahtteáigge resursageavaheamis, ja makkár mearkkašupmi ruvkedoaimmas sáhttá leat Kalaallit Nunaata iešbirgejumi ohcamis. 

Inuk Jørgensen (r. 1981) eret Qaqortoqas, Kalaallit Nunaatas, lea filbmadahkki gii lea bálkkašumiid vuoitán ja gii čalmmustahttá persovnnalaš muitalusaid inuihtaid kultuvrra, historjjá ja identitehta birra. 
 

Duhát jagi

Sápmi, 2022, 6 min. Dokumentára
Bagadallan/giehtačálus: Ellos Deatnu
Giella: Davvisámegiella, tekstejuvvon eŋgelasgillii

Deanus (Suo. Teno, Nor. Tana) lea jaska daningo Norgga ja Suoma stádat leat mearridan ollásit gieldit luossabivddu, sivas go luossanálli lea rašes dilis. Davvisámegielas bivdit sánis leat guokte mearkkašumi. Dat lea ieš dat geavatlaš dahkku go leat geahččaleame darvehit juoidá, muhto bivdit mearkkaša maiddái jearrat juoidá, bivdit juoidá juogamas. Bivdit lea maiddái jearaldat oanehisfilmmas, mii duođašta Ellos Deatnu lihkastaga 2021 geasi birasdáiddainstallašuvnna. Filbma lea maiddái audiovisuála ávvudeapmi Deanu čázádagas ja dan ássis, luosas. 

Ellos Deatnu lea aktivistajoavku mii vuostálastá ođđa Deanusoahpamuša ja ovddida sámi iešstivrema ja báikkálaš hálddašeami Deanuleagis. Jovkui gullet báikkálaš sápmelaččat goappat beale Deanu ja eará berošteaddjit.