Urfilm shorts

Filmmat

Eamifilbma shorts lea čoahkkádus Sámi, Kalaallit Nunaata ja Guatemala eamiálbmotfilbmadahkkiid oanehisfilmmain. Čájálmas bistá 55 min ja lea Nisga’a-viesus. Bileahtaid ii várre ovdagihtii.

Liremu Barana (meara siellu)
Guatemala/Norga, 2019, 10 min. Drámá/oanehisfilbma
Bagadallan/giehtačálus: Elvis Caj Cojoc ja Elisa Pirir

Arisa lea lávlu ja dánsejeaddji guhte gávdná jeđđehusa mearas, eatnis rávvagiin ja oainnáhusain áhkustis. Lávlagiiguin garifunaálbmoga dáistaleamis gaskkustuvvo subtiila ja poehtalaš muitalus máttuin ja kolonialismmas, ja buot dáhpáhuvvá Guatemala karibalaš rittus. 

Filbma lea vuoitán Gullstolena Grimstada oanehisfilbmafestiválas jagis 2020 ja lea vuosihuvvon moanat riikkaidgaskasaš filbmafestiválain, nugo Uppsala International Film Festival, ImagineNATIVE, Rio de Janeiro International Film Festival, Vienna Shorts, Cinelatino.

Elvis Caj Cojoc (Maya, Poqomchi ‘, Alta Verapaz) lea ráhkadan čieža oanehisfilmma, earet eará Nanimaj Chik (Rávásnuvvat fas) ja Flor Blanca. Su barggut leat vuosihuvvon earet eará festiválain Vienna Shorts, Uppsala Short Film Festival, Chicago Latino Film Festival. Dál son lea ovdánahttigoahtán vuosttaš guhkesfilmmas, Resistir, norgga Mer Film nammasaš fitnodagain. 

Ajornianngilatit (You’ll Be Okay)
Kalaallit Nunaat, 12 min. Drámá/oanehisfilbma
Bagadallan/giehtačálus: Aka Hansen
Giella: Ruonáeatnangiella, tekstejuvvon eŋgelasgillii

Eadni, guhte lea olles eallima rahčan mánáidis dihte ja garrasit bargan bearrašis ovddas, vuolgá muhtin eahkeda olggos suohtastallat ja gávnnada soapmásiin erenoamážiin. 

Aka Hansen (r. 1987 Aarhusas) lea máŋga bálkkašumi vuoiti ja inuihtalaš filbmadahkki guhte orru Nuukas, Kalaallit Nunaatas. Son lea bargan Kalaallit Nunaata filbma- ja TV-industriijas ollu jagiid. Jagis 2013 álggahii iežas filbmabuvttadanfitnodaga, Uilu, mihtuin buvttadit eanet eamiálbmotmuitalusaid Kalaallit Nunaata ja dan álbmoga birra.

Dološ niegut
Sápmi/Suopma, 2022, 3 min. Musihkkavideo
Bagadallan/giehtačálus:  Marja Viitahuhta ja Ánnámáret 

Muittut ja dokumenterejuvvon govat boazodoalus ja johttiálbmoga eallimis seaguhuvvojit dálááigge boazodoaluin “Dološ niegut”-filmmas. Movt mii ipmirdit árgabeaivámet čuohcá min oainnuide ja min miellagovahallamii, sávaldagaide ja nieguide. Eallimat čadnon eará heakkalaččaide, dán vuoro bohccuide, ja movt sápmelaččat leat eallán dan oktavuođas, sorjjasvuohtamet min birrasii, vuhttojit dán barggus. Dán luođis Ánnámáret maiddái faŋuha govahallat movt min máttut oidne dán máilmmi ja mii sis sáhttá báhcán dán áiggi rávdnjái mas mii eallit ja vugiin movt mii doaibmat das.   

Marja Viitahuhta lea mediadáiddár ja filbmadahkki guhte elii nuorran Anáris ja rávisolbmoeallima Turkus ja Helssegis. Ollu jagiid lea son dál ovttasbargan sámi musihkkariin Ánnámárehiin, videobargguiguin akkompagneren musihka live ja hábmen eksperimentála musihkkavideoid. 

Háldi
Sápmi/Norga, 2021, 5 min. Oanehisfilbma
Bagadallan/giehtačálus: Ann Holmgren
Giella: Davvisámegiella

Háldi lea sierralunddot sámi oanehisfilbma maid Ann Holmgren ja Mette Henriette leaba hábmen ráji nalde filmma ja musihka gaskkas. Filbma ovdána sámi eatnanvulošmáilmmis gos sáhttá viežžat oaivádusa ja fámu. Dán máilmmis lea Háldi ovdogohccin buot ealli heakkalaččaide. Filbma guovdilastá ovttadaga ja fámu nissoniid relašuvnnain sámi árbevierus ja mytologiijas. 

Skádja
Sápmi/Norga, 2022, 16 min. Oanehisfilbma, 
Bagadallan/giehtačálus: Eili Bråstad Johannessen
Giella: Davvisámegiella, tekstejuvvon eŋgelasgillii

Guokte nissona gávnnadeaba vuovddis. Okta sudnos guoddá lossa koaffara, goappašagat guoddiba vássánáigge traumaid. Skádja guorahallá gaskavuođa gaskkal luonddu, vuoiŋŋalašvuođa, áŋggaštusa ja lihkastagaid. 

Eili Bråstad Johannesen lea sámi visuálalaš dáiddár, giehtačálusčálli ja buvttadeaddji. Filbmadahkan laktásii lunddolaš guhkideapmin su jaskesgovaid govvenbargui. Son dahká ovttasbargguid ja ealli ovdanbuktimiid ovttas eará dáiddáriiguin ja eksperimentála filmmaid teáhteriidda. Son lea leamaš fárus ásaheame ja lea miellahttu queer feminista videodáiddakollektiivvas, Tensememoris, mii lea Berlinas.

Eamifilbma shorts lea čoahkkádus Sámi, Kalaallit Nunaata ja Guatemala eamiálbmotfilbmadahkkiid oanehisfilmmain. Čájálmas bistá 55 min ja lea Nisga’a-viesus. Bileahtaid ii várre ovdagihtii.
 

Eallin lea guovvtesuorat niehku - Life is a two-way dream
Sápmi, 2020, 8 min.
Bagadallan/giehtačálus: Gjert Rognli

Filbma “Eallin lea guovttesuorat niehku” čájeha máilmmi mii rievdá jođánit, gos polariseren ja globaliseren doalvu máŋgga guvlui. Mii leat áiggis mas bálvalit nuorravuođa, leat garrasit darvánan dálááigái ja mis lea ekstrema individualisma. Min otná dágut váikkuhit mo boahtteáigi olbmot sáhttet eallit. Dološ sámi noiddiid viisodat gođđá eará dulkoma ja muitalusa. 

Gjert Rognlis lea luonddu fápmu iežas dáiddapráksisa váibmun. Su dáidagis deaivvadit árgabeaivvi ja surrealisttalaš referánssat. Son ovdánbuktá filmma, fotografiija, performánssa ja bácciid bokte. Su sámevuohta nana vuođđun su dáidagis. Rognli lea ožžon máŋga riikkaidgaskasaš bálkkašumiid iežas filmmaid ja govaid ovddas, ja sus leamaš čájáhusat sihke ruovttus ja máilmmis, nugo Louvre-museas Pariissas. Son lea bargan muhtin Norgga deháleamos kulturásahusaid ovddas, nugo NRK ja Riksteatret.

share

The next events

17:00
Lávddáš
17:00
Yurta
Čájálmasat
18:00
Kulturlatnja
19:00
Lávdi
19:00
Lávdi
20:30
Lávdi
Konsearttat
22:00
Lávdi