Biertavárri 1900-logus. Mii dáhpáhuvvá go riikkaidgaskasaš fitnodat báhkke giddejuvvon servodahkii ja dagaha guokte dulvadeami vákkis, eaige mávsse buhtadusa giliálbmogii? Ja mii dáhpáhuvai smávvadoaluiguin ja vuotnaguolástemiin mas mearrasápmelaččat, kvenat ja dáččat álo ledje eallán? Moskogáissá ruvkket ja eará ruvkket Biertaváreguovllu váriin gohčoduvvojit balddusovdamearkan das movt industriija ii galgga jođihuvvot.

Odd Marakatt Sivertsen gii lea Gáivuonas eret, geavaha iežas sámi ja lestadiánalaš duogáža inspirašuvdnan iežas buvttuin. Son debuterii girječállin 2008:s iešbiografiijain Med havet i hånden. Girji govvida lestadiánalaš bajásšaddama Ivgus mii lei hui pietisttalaš ja ipmilbalolaš, muhto servodagas lei maid nana searvevuohta ja gullevašvuohta. Romána "Ingen tårer i Moskogaisa" ilmmai jagis 2021 ja govvida ovtta dain vuosttaš industriijaprošeavttain mii lei sámi guovllus, namalassii Biertaváreguovllu váriin Davvi-Romssas (1898-1919).  

Irene Larsen (r. 1964) lea diktačálli ja oahpaheaddji gii lea Skiervvá suohkanis Davvi-Romssas eret. Su mearrasámi duogáš ivdne su govvarikkis kontrásttalaš poesiija davvinorgalaš eallima historjjálaš, myhtalaš ja ođđaáiggi geahččanguovllus. Son lea 2015 rájes bargan oahpaheaddjioahpus Romssa árktalaš universitehtas. Sus leat maiddái leamaš bargogohččumat Kultuvrralaš skuvlaseahka/Den kulturelle skolesekken ovddas. Sámekultuvra, árgabeaivveeallin ja myhtalašvuohta báidná Larsena lyrihka, ovttas ođđaáigásaš, urbána ja máilmmiviidosaš fáttáiguin.