Mii dáhpáhuvvá go eamiálbmogiid eana geavahuvvo stuora ruđaid dihte, muhto báhcá ieš guoros gieđaid? Filbma Grønlands hvide guld Kalaallit Nunaata kryolihttaruvkkiid birra almmostahttá ekonomalaš historjjá, mii čalmmustahttá Dánmárkku koloniála árbbi. Dát ii leat dušše ruonáeatnanlaš muitalus, muhto universála muitalus eamiálbmotguovlluid dálá koloniseremis, geavaheamis ja vuostálastimis.      

Áiggis go politihkalaš jođiheaddjit, nugo Donald Trump, sáhttet evttohit oastit Kalaallit Nunaata, dego dat livččii vuovdimassii, lea vel deháleabbo loktet ruonáeatnanlaš jienaid ja muitalusaid. Filbma lea boktán digaštallama Dánmárkkus go hástala nationála narratiivvaid ja juste dan dihte lea dán dehálaš čájehit Riddu Riđđus. Midjiide lea álo leamaš dehálaš ieža beassat muitalit muitalusaideamet, iežamet eavttuiguin.     

Naja Dyrendom Graugaard introdusere filmma ja maŋŋel lea ságastallan suinna ja filbmadahkkiin Aka Hanseniin. Dát lea politihkalaš ja persovnnalaš filbma – ale manat dán!  

Grønlands hvide guld:  

Filbma muitala kryolihta birra maid leat roggan Kalaallit Nunaatas ja mii lea buktán mearehis ruhtasupmiid, ja movt eanas ruhta lea gártan olggobeallái Kalaallit Nunaata. Muitalettiin kryolihta muitalusa ja čuovodettiin ruhtajođu háliida filbmadahkki čilget movt Kalaallit Nunaata lea leamaš arvat árvvoleabbo ekonomalaččat dánskka servodahkii – ja erenoamážit unna dánskalaš jovkkožii – go mii boahtá ovdan historjágirjjiin. Oanehaččat sáhttá dadjat ahte filbmadahkki háliida hástalit myhta mii dadjá Kalaallit Nunaata leahkit agálaš gollun.  

Filbmadahkki mielas lea dehálaš deattuhit ahte dát dihto muitalus kryolihttaruvkke ja ruhtajođu birra maiddái čilge mo koloniseren dábálaččat doaibmá eará riikkain nai, ja dat guorahallá fysalaš ja psykologalaš váikkuhusaid mat leat olbmuide geat ellet kolonialiserema čuvvosiiguin.