Iluin beassat muitalit ahte Simon Issát Marainen čuojaha Riddu Riđđu váldolávddis dán geasi! 

Marainen lea Sohpparis eret ruoŧa beal Sámis. Son lea beaggán leat okta dálááiggi stuorimus árbevirolaš juigiin, ja su musihka vuođđun leat su ruohttasat ja dát lea čielga sámi musihkka. Marainena čilgejit govda ja čiekŋalis jietnadáiddárin go son lihkada oarjemáilmmi šuoŋaid ja 1000 jagiid boares árbevieruid gaskkas.     

Árbevirolaš juoigan gullá Riddu-lávdái, ja mii leat nu ávus beassat čuovvulit Marainena go erenoamáš jienainis ja gaskkustemiinis lokte min mátkái. 

Dán gal duođas it hálit manahit, mii goit eat bálljo nagot vuordit!