UiT - Norgga árktalaš universitehta museas lea odne stuorámus luohtevuorká máilmmis. Universitehtamuseas lea dál proseassa almmuhit luohtebáddemiid iešguđet digitála vuogádagaide DigiJoik-prošeavtta bokte. Seammás almmuhit ollu dáiddárat ja ásahusat iežaset boares luohtebáddemiid dahje ođđa luđiid digitála vuogádagaide, ja dan bokte čájehit ahte boares luohtebáddemiid geavaheapmi lea jođánit rievdamin.

Musea cuiggoduvvui garrasit go ii lean vejolaš beassat arkiivii earret go jus galledii musea, ja dáinna lágiin ráddjejuvvui vejolašvuohta beassat deaŧalaš oassái sámi kulturárbbis. Arkiivvas leat ollu sámi dáiddárat fitnan ja dat adnojuvvo mávssolaš vuohkin oahpásmuvvat dološ luđiid ja juoiganárbevieruid máŋggabealátvuođain. Ollu artisttat leat vuođđudan iežaset barggu luohtebáddemiidda maid sii leat gullan arkiivvas, nu go omd. Inga Juuso. Dán njuolggosáddjojuvvon podkastas guorahallat gaskavuođaid arkiivva gaskkas ja mo dán áiggi juoigit ja dáiddárat oidnet ja geavahit dan.

Man láhkai lea arkiiva hábmen sámi dáiddáriid? Maid sáhttá luohtearkiiva midjiide oahpahit dáiddalaš perspektiivvas? Man láhkai báddemat áddejuvvojit ja geavahuvvojit dálá áiggi artisttain?

Ságastallamis lea sáhka guldaleamis, áddemis ja ealáskahttimis, mas lea vuođđun oasseváldiid iešguđetlágan oainnut ja perspektiivvat UiT - Norgga árktalaš universitehta luohtebáddema bargguin.

Logaldallan báddejuvvo njuolga Sámi ritmmat - podkastii.