Dávjá gullo sáhka ahte dáidda lea sámi servodaga vearju. Dáidagis lea fápmu lihkastahttit juoidá olbmuin geat muđui eai soaitte beroštit stuorra servodatgažaldagain. Lea go de nu ahte min dáiddáriin lea stuorát fápmu váikkuhit servvodaga go min politihkkáriin? Hálddašit go dan fámu rivttes láhkai vai lea go dušše okta bealli mii gullo? Dán dáiddárságastallamis deaivvadit lakota -ráppáriin Frank Walniin, govvadáiddáriin Anders Sunnain ja duojáriin Márjá Karlseniin. Ságastallama jođiha Alice Jektevik.

Giella: eŋgelasgiella.

Mii lea Lávvosáhka? 
Dán jagi almmuha Riddu Riđđu ođđa konseapta, mii lea oassin semináraprográmmas: Ságastallanráidu mii gohčoduvvo Lávvosáhka. Dát ságastallamat leat Bálldalávuin, ja ságastallamiid ulbmil lea guođđit oarjemáilmmi ságastallanmálliid ja máhccat eahpeformála ságastallamii.