"This is fiction-19" (2020)
Juhkki sámi nisu lea okto iežas meahccebarttas COVID-19-pandemiija áigge. Son fuomáša ahte gii nu lea sárgon su bartaseaidnái ja iská gávnnahit gii dan lea dáhkan.

Bagadallit: Ingir Bål Nango ja Marja Bål Nango
(16 min.)
 
"Coviida bures ja baháš beivviid" (2020)
Humoristtalaš filmmažis Coviida buriid ja bahás beivviid oaidnit mo dávdanjoammuma hehttema vehkiin sáhttá heaitalit go dovddut leat áigá juo nohkan.

Bagadalli: Sara Margrethe Oskal
(5 min.)
 
"Gákteboles" (2021)
Golbma sámi albmá vulget oaivegávpogii. Okta coggá gávtti geasuhan dihte rivguid. Nubbi oaivvilda ahte ii leat ehtalaš dan dáhkat, ja goalmmádis lea bahča dovdu go son ii geasut nissoniid go gákti badjelis. Gákteboles lea sámi oatnefilbma mas humor ja politihkalaš bastilvuohta. Filbma lea identitehtasatire mii govvida mo olbmot, sihke sápmelaččat ja majoritehtaálbmot, dihtomielalaččat ja dihtomiehtumat definerejit mii lea rivttes vuohki leat sápmelaš.

Bagadalli: Egil Pedersen.
(12 min.)
 
"Buot iežan bohccuid dovddan" (2021)
Karen Anna lea filbmejuvvon iežas árgabeaivvis Guovdageainnus. Filmmas jurddaša ja suokkardallá son iežas guhkes eallima birra nissonolmmožin boazodoalus. Karen Anna áhkut, Ánne Kátjá Nilsdatter Gaup, lea govven ja čuohppan, ja Kvaal lea bagadallan.

Bagadalli: Grete Andrea Kvaal
(24 min.)
 
Filbmačájáhus bistá 57 min.
Filmmat čájehuvvojit golbma geardde festivála áigge: duorastaga, bearjadaga ja lávvordaga.
Filmmat čájehuvvojit Nisga’a-viesus. Dohko ferte ovddalgihtii várret saji. Dan lea vejolaš dáhkat vuossárgga 12.7 rájes. Buohkat geat leat oastán bileahta festiválii ožžot dieđu dán birra e-poasttas.