Aqqalu Berthelsen, beaggán maiddái Uyarakq namain, riegádii Nuukas Ruonáeatnamis 80-logu gaskamuttus. Son lea iešoahppan musihkkabuvttadeaddji/komponista ja DJ geas lea metállamusihkka duogážis. 

Mánnávuohta Uummannaqas Davvi-Ruonáeatnamis ja Nuukas, oaivegávpogis, lea buori muddui hábmen su máŋggabealat musihkarin gii lea guovtti máilmmi gaskkas. Dáid áiggiid lea son aktiiva eamiálbmogiid sirkumpolára hip-hop- ja ráp-lávddis, juolgi goappáge máilmmioasis, davviamerihkálaš árktisis ja eurohpálaš árktisis.

Uyarakq vuittii ruonáeatnanlaš Koda-bálkkašumi 2015:s soloálbumiin Raatiu Nukik (2014) ja nammaduvvui Davviriikkalaš Ráđi musihkkabálkkašupmái jagis 2016 Kunngiitsuuffik (2015) nammasaš buvttuin ovttas ruonáeatnanlaš ráppáriin Peand-eL. Dál orru Ottawas Kanadas.