Dán jagi UiT-seminára fáddán lea rájiidrasttildeaddji ovttasbargu eamiálbmogiid gaskkas, otná geopolitihkalaš dilálašvuođain duogážin. Makkár mearkkašupmi šaddá ovttasbarggus ja oktiigullevašvuođas boahttevaš áiggis? Mo váikkuhuvvo searvevuohta dain stuorapolitihkalaš oainnuin? 

Historjádovdi Katri Somby álggaha seminára suokkardallamiin politihkalaš oainnuid ja ovttasbargguid birra historjjálaš geahčastagas, sámepolitihkalaš lihkadusain vuolggasadjin. Dasto geahčestit ovddas ja jearrat makkár stáhtus eamiálbmotovttasbargguin lea odne. Dálá áiggi sáhttá dadjat ráfehis áigin, sođiiguin ja riidduiguin. Dás leat áibbas čielgasit váikkuhus eamiálbmogiidda ja rájiidrasttildeaddji ovttasbargguide. Semináras áigut čalmmustahttit muhtin dain. Áigut maiddái suokkardallat mo sáhttá suddjet árvvuid nugo oktiigullevašvuođa ja searvevuođa. Sáhttet go historjjálaš eamiálbmotovttasbarggut veahkehit min ipmirdit otná dili ja boahtteáiggis cuiget midjiide geainnuid? 

Ságastallama jođiha Kristin Evju, universitehtalektor, Sámi dutkamiid guovddáš, UiT Norgga árktalaš universitehta.