Nationála luossahálddašeami ja sámi luossabivdoárbevierut beaškkehit dávjá oktii. Áigeguovdilis ja hástaleaddji ášši lea earret eará maŋemuš Deanusoahpamuš Norgga ja Suoma gaskka, mii lea boktán ollu vuostehágu Deanuleagis goappašiid bealde rájá, earret eará Deanučázádaga guolástanhálddahusas, njeallje bivdin-kooperatiivvas Suomas ja Ellos Deatnu kollektiivvas. Máŋgasat ákkastallet ahte báikkálaš árbevierut ja máhttu luosa birra eai leat legitiibma máhtut Deanu hálddašeamis. Seammás lea jođus bargu ráhkadit ollislaš hálddašanplána Deanučázádahkii, mii fátmmasta maiddái árbevirolaš máhtu.

2019 lea riikkaidgaskasaš luossajahki, ja UiT Norgga árktalaš universitehta ja Riddu Riđđu-festivála bovdeba seminárii mii guovdilastá áigeguovdilis nákkuid, sámi árbevieruid ja vejolaš rádjarasttildeaddji ovttasbargguid luosa ektui. Oasseváldit leat luossaaktivisttat ja -áššedovdit, ja sis leat vásáhusat aiddo čađahuvvon guolástangearregis ja Deanučázádaga hálddašeami nákkuin.

Seminára lea eŋgelasgillii.

Panelas leat:

• Aslak Holmberg: luossabivdi, aktivista, politihkkár ja akademihkar Ohcejogas eret.
• Kati Eriksen: luossaaktivista Ohcejogas eret. Kati lei okta sis guhte manai guolástangearregii Suoma stáhta vuostá oažžun dihte árbevirolaš bivdovuoigatvuođaid dohkkehuvvot – ja vuittii!
• Solveig Joks: Sámi allaskuvlla vuosttašamanueansa. Son lea čállán nákkosgirjji “Laksen trenger ro” gos guovdilastá Deanučázádaga luossabivddu árbevirolaš máhtu.
• Sáhkajođiheaddji Camilla Brattland: UiT Norgga árktalaš universitehta vuosttašamanueansa. Camilla lea ovttas Solveig Joksain mielde ođđa dutkanprošeavttas SALCUL, man ulbmil lea lasihit dieđuid luosa kulturbirrasa hálddašeamis.

Govva

Govva