Leatgo gullan luođi ártnaid birra? Leatgo oaidnán mo dat čuovgá ja makkár muitalusaid ráhkada? 

Luohteárdna lea čájálmas mii ovttastahttá rumbbostalli ja báddenmašiinna. Báddenmašiinnas leat luođit, ja luđiin lea fápmu ráhkadit muitalusaid, govvosiid ja animašuvnnaid. Daid bokte mii jođašit eanadagaid ja jahkodagaid čađa, ja deaivvadit elliiguin ja olbmuiguin. Mátkkis mii deaivvadit misiin, áldduin ja ealuin. Mii báhtarit eret gumppes, mii lahkonit guvžii ja beassat gullat luđiid mat gullet báikkiide maid galledit. 

Jakop Janssønn gaskkusta gehččiide buot dáid govvádusaid. Veahkkin sus leat Inga-Wiktoria Påve illustrašuvnnat, surround-jietnagovvádusat, videodesigna ja animašuvnnat. 

Čájálmas lea erenoamážit oaivvilduvvon sámi mánáide, muhto lea rabas buohkaide. 

Čájálmas bistá sullii diimmobeali. 

Dáiddárat: Jakop Janssønn - šuokŋadahkki/heivehalli ja rumbbostalli 

Luohtebáddemiin gullat - Marja Mortensson, Ánte Mihkkal Gaup, Anders P Bongo, John André Eira, John Mathis Utsi, Jörgen Stenberg, Cecilia Persson, Kajsa Balto, Lávre Johan Eira, Niillas Holmberg ja Ásllaga Ánte 

Inga-Wiktoria Påve - Illustrašuvnnat 

Peter Knudsen - Videodesigna 

Ingo Rau - Jietnadesign