Johkaeamiálbmogat leat Dán jagi davvi álbmot 2026
Riddu Riđđu lea ilus oainnusmahttit johkaeamiálbmogiid Dán jagi davvi álbmogin 2026. Dán jagi delegašuvnnas leat iešguđetlágan eamiálbmogat Alaskas, Turtle Islandas/Kanádas, Kalaallit Nunaatas, Sámis ja Japana Ainu-guovlluin – servodagain mat visot ellet lagas oktavuođas jogaiguin ja eanuiguin, gos čáhci guoddá buolvvaid gaskka muitalusaid ja máhtuid.
Dán jagi davvi álbmot lea okta festivála eanemus guovddáš kulturpolitihkalaš doaimmain. Eanet go 25 jagi lea prošeakta huksen šaldiid sápmelaččaid ja iežá eamiálbmogiid gaskkas davviguovlluin, ja dahkan Riddu Riđu riikkaidgaskasaš gávnnadanbáikin kulturlonohallamiidda, oktiisearvanbargguide ja solidaritehtii.
Jagis 2024 válljiimet gudnijahttit bonju eamiálbmogiid. Dalle lei prošeavttas vuohččan vuolggan temáhtalaš ja kulturrasttildeaddji joavku beroškeahttá eamiálbmot- ja riikkagullevašvuođas. Leimmet mielaeavttus válljen ná vai lážiimet saji jienaide ja vásáhusaide mat guhká ledje leamaš ravddain, maiddái iežamet servodagain. Jagis 2026 dahkat fas dan. Go bovdet johkaeamiálbmogiid, de čohkket eamiálbmogiid iešguđet guovlluin davvin, geat buohkat ellet jogaiguin ja eanuiguin.
Manin johkaeamiálbmogiid?
Go Riddu Riđđu 2026:s oainnusmahttá johkaeamiálbmogiid Dán jagi davvi álbmogin, de dáhpáhuvvá dat áiggis go jogat ja eanut miehtá Sámi ja eamiálbmotguovlluid davvin guddet čuvvosiid mat leat boahtán ollu buolvvaid industriála sisabahkkemiin, badjelmeare guolásteamis ja dálkkádagas mii johtilit rievdá. Riidodilit čázádagaid dihte nugo Deanus Sámis muittuhit min ahte jogat ja eanut eai leat dušše birrasis, muhto ealli oktavuođain ja ieš vuođđun eamiálbmogiid eallimiin ja boahtteáiggis.
Maiddái Gáivuonas vuhttojit čázádagain čielgasit dakkár riiddut. Čázádagat leat garrasit váikkuhuvvon čáhcefápmohuksemis, ja ollu logijagiid lea báikkálaš servodat eallán dáid huksemiid čuvvosiiguin. Seammás leat buollisearat báikkálaš servodagas bargan gillilit áittardit dan mii ain gávdno, ja máhcahit oasi das mii jo lea manahuvvon.
Biertaváris lea gilli leamaš riiddus fápmohuksenfitnodagain badjel vihttalot jagi, ja ellet ain Guoláža čáhcefápmohuksema guhkilmas váikkuhusaiguin. Riidodilli lea ain, otná dán beaivvi.
Maiddái Olmmáivákkis leat báikkálaš vuoimmit váldán ovddasvástádusa. Guhká lea Manndalen Jeger- og Fiskeforening bargan dihtomielalaččat máhcahit Olmmáivátetnui dili mii lea lagabus dan mii das lei ovdal huksemiid – buorrin sihke guliide, birrasii ja giliássiide.
Dát báikkálaš rahčamušat eai leat áidna dakkárat, baicce oassin stuorát govas. Dat mii dáhpáhuvvá ovtta jogas dahje eanus, dat váikkuha eará jogaid ja eanuid, meara gosa čáhci golgá, ja servodagaid ja heakkaid mat leat sorjavaččat das. Dát ii leat dušše ekologalaš vahát, dat lea maiddái vejolaš boatkan máhttofievrrideamis buolvvaid gaskkas. Áigumuš johkaeamiálbmogiid loktemiin lea dasto čalmmustahttit daid čiekŋalis čanastumiid mat mis eamiálbmogin leat guovlluidasamet, ja dahkat saji muitalusaidasamet, máhtuidasamet ja min iežamet čovdosiidda dálkkádagas ja servodagas mii johtilit rivdet.
Máhtut mat golget rastá rájiid
Prošeavtta vuolggasadji lea ahte eamiálbmogat ieža guddet máhtuid ja čovdosiid maidda lea dárbu áittardettiin iežaset guovlluid, seammás go mii bovdet ávvudit min girjás johkakultuvrraid ja searvevuođa.
Bargu lea The International Indigenous Salmon Peoples Gathering joatkka, mii lágiduvvui Kárášjogas 2024:s ja Kárášjoga-julggaštusa mii dan čuovui ja mii čielgasit deattuha dárbbu ovttasbargui, vuhtiiváldimii ja eamiálbmogiid iešmearrideapmái čáhce- ja luossahálddašeamis. Loga Kárášjoga-julggaštusa birra dás.
Jagis 2026 áigu Riddu Riđđu láhčit saji deaivvadanbáikkiide, máhttolonohallamiidda ja ovttasbargguide gaskkal johkaeamiálbmogiid geat bohtet feara gos davviguovlluin. Oassin das almmuhit Open Call, mas bovdet dáiddáriid ja árbevierroguddiid, geat gullet johkaeamiálbmogiidda, oassálastin Dán jagi davvi álbmoga delegašuvdnii 2026 Riddu Riđus.
Loga eanet ja oza dás.