Muorra lea oanehisfilbma mii váldá du mielde mátkkošteapmái Sámi guovlluid čađa, mas guovlluid stuorra fápmu ihtá oidnosii. Olbmuid ja eatnamiid oktavuohta lea unnon ja unnon, ja dáinna filmmain háliida Hætta čájehit ahte oktavuohta dán guovtti gaskkas ii leat nu billašuvvon go livččii galgan jáhkkit.

Dát lea erenoamáš vejolašvuohta oaidnit filmma live musihkain go Lávre Johan čuojaha dán čájáhussii. Bures boahtin!

Ovttasbargit: Forest People, Ándaras Leonardsen ja Lávre Johan Eira.

Riddu sessions 2024: 

Jagi 2023is válljejuvvui Mihkkal Hætta Riddu Riđđu festivála nuorra dáiddáriin ja oaččui dan oktavuođas ráhkadit dán jagáš Riddu sessions, festivála sierra prográmma nuorra sámi dáiddáriidda.  

Dán jagáš Riddu sessions lea oanehisfilbma maid Mihkkal Hætta lea ráhkadan, lassin lávvoinstallašuvdna Riddu-festiválabáikkis. Hætta lea nuorra sámi filbmadahkki ja aktivista.  

Riddu sessions bokte oahpásmuvvet geahččit Hætta ráhkisvuhtii min eatnamiidda.  

Biografiija: 

Mihkkal Hætta lea 23 jahkásaš sámi filbmadahkki Guovdageainnus eret. Hætta háliida lasihit áibbas ođđa šáŋra sámi filmmaid válljenmáilbmái mii dađistaga stuorru. Hættas leat stuorra mihttut su dáidagiin; sus lea miella fievrredit sámi muitalanárbevieruid šerbmii ja guoskat gehččiid váimmuide sámi arthouse-filmmaiguin.

Riddu sessions lea ovttasbargu Talent Norge ja Seastinbáŋkku 1 Davvi-Norgga gaskkas.

Govva