Girjerádjosis ofelastit min festiválačájáhusas, Visualising Arctic Voices! 

Varra leat fitnan čájáhuslanjas ja imaštallan makkár muitalusat leat dáid dáidagiid duogábealde? Per Asle Sara čájeha ja ofelastá du čájáhuslanjas ja juogada dunnje daid ollu muitalusaid.

Dáiddačájáhusa birra: 

Čájáhus muitala ja guorahallá Árktisis váldon govaid, ja daid bakte luottaid mat gávdnojit eamiálbmogiid biografiijain, kultuvrrain ja vásihemiin dalle go leat deaivvadan koloniála aktevrraiguin.

Govaid fáttát leat Sámi, Kalaallit Nunaat, Inuit Nunangat ja Alaska eamiálbmogat, eanadagat ja eallit, áigodagas go koloniála sisabahkken ja oktavuođat ledje lassáneamen. Govat gullet oktii dainna go dat ilbmanedje deaivvademiin olbmuid gaskkas geain ledje iežaslágan kultuvrrat ja iešguđetlágan agendat ja ipmárdusat olbmuid, elliid, luonddu ja kultuvrraid gaskavuođain. Dáiddačájáhus guorahallá govt sáhttá váldit ruovttoluotta historjjálaš govaid ja vejolaččat riggodahttit árktalaš eamiálbmogiid otnáš historjjá ja kultuvrra.

Čájáhusasas oainnát dáidagiid maid sámi dáiddárat leat dahkan, nugo Outi Pieski, Anders Sunna, Raisa Porsanger, Áillohaš/Nils Aslak Valkeapää (1943-2001) ja Aage Gaup (1943-2021), ja daidda lassin ruonáeatnálaš dáiddár Bolatta Silis-Høegh, ja sugpiat antropologa, kurator ja dáiddár Sven Haakanson.

Govva bajábealde: Anders Sunna, Death Means Nothing for the Colors, 2009. Sámi Dáiddamagasiidna / Sámi Art Collections, RiddoDuottarMuseat, Kárášjohka. Govven: Håkon Holmgren Gabrielsen.