Riddu Riđđu Festivála taleantalokten «Riddu sessions» lea hirbmosit lihkostuvvon. Jurdda doaimmain lea diktit sámi nuorra čehpiid ain ovdánit. Hárjánan láidesteddjiid vehkiin galgat nuoraid movttiidahttit ođđa, gelddolaš prošeavttaide ja surggiide. Ovttas Seastinbáŋku 1 Davvi-Norgga Kulturealáhusvuođđusain  ja Talent Norge-servviin lea leamaš vejolažžan ásahit taleantaloktema oassin Riddu Riđđu ollesjagiprográmmii.

Katarina Barruk, Elina Mikalsen ja Marja Mortensson ledje Riddu Sessions 2016 oasseváldit. Ođđajagimánus jagi maŋŋil almmuhuvvui sin vuosttaš EP, man namma lea «Golbma jiena», ja maid musihkkavideo. 

Dáiddárat Anders Sunna ja Inga-Wiktoria Påve dahkaba «Riddu sessions 2017». Goappašagat leaba ovdal leamašan Dán jagi Nuorra Dáiddár Riddu Riđđus. Fárrolaga leaba ráhkadan animašuvdnafilmma mas vuosttaščájáhus galgá leat dán jagi festiválas. Filbma muitala Sámis ja kolonialismma váikkuhusain, ja namma lea «Morit Elena Morit!». Láidesteaddjin prošeavttas lea leamašan Isak Gjertsen, gii lea bargan ollu oanehis animašuvdnafilmmaiguin ja dokumentárafilmmaiguin, maid dihte lea fiškalan ollu bálkkašumiid.