Jagi nuorra dáiddárat 2021 leaba nuorra dánsejeaddjit Biret Haarla ja Gáddjá Haarla, Dálvadasas eret Deanuleagis. Soai leaba 21 jagi ja lohkaba dánsuma P.A.R.T.S. (Performing Arts Research and Training Studios) ásahusas Brüsselis. Ovdal leaba viežžan oahpu baleahttaskuvllas Helssegis ja leaba leamaš fárus moanat dáiddaprošeavttain ovttas Marja Helanderiin, Pauliina Feodoroffiin ja Outi Pieskiin.

Dánsumis guorahallaba fáttáid nugo sámi gullevašvuođa, movt historjámet ja eallinvuohkámet čuohcá rupmašasamet ja olbmo oktavuhtii eatnamiin. Maŋemus fáddá šattai erenoamáš áigeguovdilin dallego Biret ja Gáddjá jagis 2019 searvvaiga dálkkádatkonferánsii Madridas ovttas eará eamiálbmogiiguin.

Sáhtát vásihit sin Lávddis/váldolávddis ja Kultursálas. Ferte ovdal gihtii oastit bileahta čájálmassii mii lea Kultursálas, ja dan sáhttá dahkat festiválavahkus. Buohkat geat leat oastán bileahta ožžot dieđuid dán birra e-poastan.