Guovttis Sámi njunuš DJ:in ovttasteaba fámuideaskka ja lohpideaba klubbaferema maid it jur dakkaviđe vajálduhte!

Goappašagat leaba beaggán artistan elektronika-šaŋŋeris maŋemus jagiid, ja leaba goabbáge čuojahan sihke unnit ja stuorát lávddiin feara gos Sámis. Beassášfestiválas Guovdageainnus árabus dán jagi čuojaheigga vuosttaš geardde ovttas, ja spagga dievva Báktehárji dávistii bures.

Áŋggaštusain elektronalaš dánsunmusihkkii ovttastahttiba iDJa ja Ailo urbána elektronika árbevirolaš elemeanttaiguin ja juoigamiin. Oaivádusgáldun lea ovtta bealde iežaska sámi duogáš ja nuppe bealde house, techno ja disco. Mihttu lea hábmet ođđa kulturovdanbuktimiid ja dánsunláhttis vuosihit daid gehččiide!

Goappašagat leaba máŋggaid jagiid almmuhan musihka individuálalaččat ja ovttas eará sámi artisttaiguin. Go dál vuosttaš geardde čuojaheaba ovttas Riddus, de lohpideaba ferema mii fille du dánsut miehtá geasseija!