Viktor Bomstad ja Elina Waage Mikalsen guovttos leaba dynámalaš Ale, Ale! Dán konsertii leaba čohkken lestadiánalaš sálmmaid ja ovdanbuktinvugiid bázahusaid ja bidjaba daid oktii juoigamiin, riejain ja improvisašuvnnain. Sálbmalávlun lei ja lea čoaggananbáiki gos sáhttá guođđit árgabeaivvi ja várdát iežas sisa. Dáin lanjain bárustedje iešguđetlágan jienat oktii iešguđet leahtuin ja láhče dili vuoiŋŋalaš oktavuhtii ja buhtisteapmái. Dát lea erenoamáš jietnaduovdda mas kollektiiva ja individuála lávlla johtet giehtalagaid. Individuála ovdanbuktin fokusere sisa guvlui, ja vuoiŋŋalaš bealli ovttastahttá indiviiddaid. 

Artisttaid birra: 

Viktor Bomstad lea gitarista ja juoigi, eret Omasvuonas, Davvi-Romssas. Musihkkárin son lea guorahalli ja fátmmasta juoigamis gitta bastilis progrock ja improviserejeaddji musihkkii oktan elektrovnnalaš instrumeanttaiguin. Viktor lea mielde máŋgga joavkokonstellašuvnnas ja lea maiddái soloartista. Son lea earret eará almmuhan skearru skearrofitnodagas Rune Grammofon ja lea buriid rámiid ožžon sihke sis- ja olgoriikkas. 

Elina Waage Mikalsen lea dáiddár ja musihkkár gii orru Romssas. Dáiddalaš barggustis guorahallá son muitaleami, jietnadeami ja jietnaárbevieruid main gorut lea vuolggasadji. Son ráhkada alccesis čuojanasaid áhkus čuoldinreaidduin ja lea maŋemus jagiid čuojahan iežas nama vuolis sihke riikka ja riikkaidgaskasaš dásis. Elina doaimmaha Šuvva, mii lea lávdi geahččaladdi musihkkii, jietnadáidagii ja guldaleapmái sámi oaidninguovllus.