Ubmisámi pop-dronnet boahtá Riddu Riđđui
Riddu Riđđu lea Eurohpa stuorimus eamiálbmotfestivála, ja mis leat stuorra plánat iežamet gussiide 2023. Ubmisápmelaš Katarina Barruk lea iežas atmosfearalaš popmusihkain šaddan dovddus artistan maiddái guhkkin sámiguovlluid olggobealde. Son lea loaiddastan maid Riddu Riđu gussiide soames háviid ovdal. Odne dát popsensašuvdna julggašta guhkká vurdojuvvon nuppi studioálbuma “Ruhttuo”. Ávvudan dihte dán álbuma julggašteami, almmuha Riddu Riđđu odne ahte Barruk boahtá čuožžut festivála váldolávddis boahtte gease.
Katarina Barruk, bálkkašuvvon artista, bajásšaddan Lusspie ja Gajhrege báikkiin, lea maŋimuš 10 jagi áigge turneren miehtá Eurohpa, ja ožžon ollu rámi iežas loaiddastemiidis ovddas. Jagi 2020 son oaččui Ruoŧas allaárvosaš “SKAPs Kulturbärarpris” (SKAP Kulturguoddi-bálkkašumi) iežas musihka ovddas.
Barruka jietna lea čielggas ja čuoddjil, ja loaiddastettiin son deavdá olles lávddi iežas autoritehtain ja rašesvuođain oktanaga. Son lávlu ubmisámegillii - iežas eatnigillii - mii lea UNESCO áitojuvvon gielaid rukseslisttus. Barruka musihkka lea popmusihka, árbevirolaš luđiid ja improviserejuvvon osiid seaguhus.
Gieskat bargui álgán festiválajođiheaddji Sajje Solbakk lea rámis go beassá Barruka almmuhit:
- Mii leat nu rámis go viimmat beassat almmuhit ahte Katarina Barruk čuojaha Riddu Riđus boahtte geasi. Oaidnit su lávddis ovttas su nanu joavkkuin berrejit buohkat vásihit - unnimus oktii eallimis. Boahtte geasi oaččut dán erenoamáš vásáhusa ja vejolašvuođa Riddu Riđus. Mii nu illudit!
Ovddežis lea festivála almmuhan ahte Herman Rundberga fámolaš soloprošeakta Manne ovdanbuktojuvvo vuosttas geardde jagi 2023 festiválas. Bileahtaid sáhttá oastit DÁS.