Stream Sápmi: Emil ja Lávre
Bearjadaga čuojaheaba Emil ja Lávre. Dát lea vuosttas konsearta Stream Sámis, mii lea konseartaráidu sámi artisttaiguin. Stream Sápmi lea ovttasbargu gaskal Riddu Riđđu ja Davvi álbmogiid guovddáža.
Emil Karlsen (22) ja Lávre Johan Eira (19) lea ođđa musikálalaš ovttasbargu Sámis. Soai leaba dál bargamin skearruin mii govahallá niehkomáilmmi doložis ja dálá áiggis. Konsertii searvá maid Resirkulerta rumbočuojaheaddji Joakim Åsmund Hansen. Emil ja Lávre leaba áŋgirit čállán maŋimuš áiggi, ja bearjadaga beasat gullat áibbas ođđa šuoŋaid.
Geahča konseartta neahtas: konsearta rávdnjejuvvo duohtaáiggis facebook ja youtube bokte.
Geahča konseartta Davvi álbmogiid guovddážis: Mii sáhttit váldit vuostá 50 olbmo dálá njuolggadusaid mielde. Uvssat ráhppot dii 19.00 ja Davvi álbmogiid guovddážis leat buot vuoigatvuođat. Bileahta máksá 50 ru, mávssat uvssas vippsain. Gánneha árrat boahtit go lea ráddjejuvvon galle olbmo besset sisa.
Doarjju artisttaid:
vipps - #527421 Riddu Riđđu Festivála
paypal - [email protected]
Emil Karlsen:
Máŋgasat dovdet Karlsena lávlun Resirkulert-joavkkus. 2019:s nammaduvvui Karlsen Riddu Riđđu nuorra dáiddárin. Maŋimuš jagi lea Karlsen earet eará tulkon Áillohaš-rohkki lávlagiid ja lea čiekŋudan luohtái, ja erenomážit mearrasámi luohteárbevirrui.
Lávre:
Lávre Johan Eira (19) lea Guovdageainnus eret ja lea beaggán iežas musihkain maŋimuš jagi. Diibmá son čuojahii Guovdageainnu Beassášmárkanin eará nuorra sámi artisttaiguin. Lávre almmustahtii šuoŋa Beaivenieida 2019:s.