Snotty Nose Rez Kids Riddu Riđđui
Maŋŋá olahusjagi 2019:s lea Riddu Riđđu dál gearggus almmuhit vuosttaš artistta boahtte geasi festiválii.
Kanádalaš Snotty Nose Rez Kids:s (SNRK) leaba Yung Trybez ja Young D. Lei hástaleaddji bajásšaddat reserváhtas Kitimaatas ja dat dagahii ahte hip-hop šattai dán guovtti nuorra albmái friddjabáikin ja vuohki gaskkustit oaiviliid. Soai gullaba Haisla-álbmogii British Columbias, ja sudno musihkka gudnejahttá sudno gullevašvuođa dohko, seammás go fáttát nu mo eamiálbmotidentitehta, politihkka ja vuostálastin leat guovddážis sudno teavsttain. SNRK lea šaddan bivnnuhin Kanádas, leat buorit rávdnjenlogut ja joavku lea ožžon máŋga bálkkašumi.
SNRK dovdomearkan leat virkos ovdanbuktimat lávddis ja hirpmahuhtti ráppenleaktu.
Festiválahoavda Sandra Márjá West dadjá: In nagot govahallatge buoret nama go SNRK mainna álggahit festiválaáigodaga! Sudnos leat buorit oaivilat maid jáhkán Riddu-guossit fátmmastit, dasa lassin leaba nu mearihis čeahpit lávddi alde!
Odne vuovdigoahtit bileahtaid Riddu Riđđu 2020:i, ja vuosttaš 100 festiválabileahta vuvdojuvvojit hui oiddolaš haddái.
«Diibmá mis lei gehččiidolahus. Riddu Riđđu ii eisege bisán bosihit vaikke lea bures lihkostuvvan, dál mii áŋgiruššat boahtte jagi festivála lágideapmái. Mii leat earret eará huksemin ođđa ja stuorát váldolávddi, mii galgá addit Riddugussiide vel ain eanet vásáhusaid mat báhcet muitui. Otná artistaalmmuheapmi geažida maid boahtte jagi festivála fállá, nu ahte dás gánnáha háhkat alcces festiválapássa!» loahpaha festiválahoavda Sandra Márjá West.
Riddu Riđđu lágiduvvo suoidnemánu 8.-12. b. 2020.