Sámi idjaklubba Eurohpá stuorimus eamiálbmotfestiválas
Riddu Riđđu joatká Club Lávvu lihkostuvvon konseapttain dán geasi, dán háve ovttas idjaklubbain IDJA – Sámi Club Night. Odne almmuhedje lágideaddjit ahte ruonáeatnanlaš Uyarakq, sámi Nagirčalmmiid ja Sicangu Lakota ráppár Frank Waln galget dahkat báhkka klubbavuoiŋŋa Olmmáivákkis.
Doom-metal ja hiphop dán jagáš Club Lávus
Frank Waln lea Sicangu Lakota logadalli, guhte lea Rosebud nammasaš reserváhtas eret mii lea South Dakota stáhtas, ja son lea máŋgga šáŋgara musihkkdáiddár ja kuráhtor. Sus lea jietnadáidagis ja akustihkas BA-dásat oahppa Columbia College nammasaš universitehtas mii lea Chicago-gávpogis, ja doppe sutnje juolludedje gávpothoavdda bálkkašumi (Mayor's Award) su siviila áŋgiruššamiid (Civic Engagement) geažil.
Aqqalu Berthelsen, beaggán maiddái Uyarakq namain, riegádii Nuukas Ruonáeatnamis 80-logu gaskamuttus. Son lea iešoahppan musihkkabuvttadeaddji/komponista ja DJ geas lea metállamusihkka duogážis. Dáid áiggiid lea son aktiiva eamiálbmogiid sirkumpolára hip-hop- ja ráp-lávddis, juolgi goappáge máilmmioasis, davviamerihkálaš árktisis ja eurohpálaš árktisis.
Nagirčalmmiid lei reakšuvdna mearehis láittasvuhtii mii čuovui covid-19, 2020 giđa. Go eallin lea lossat de čállá vel losit musihka. Válljiiga doom-metala, muhto dagaiga dan iežaska ládje. Dás gullo buot, lossa ja sitkadis riff, blast beats, melankolalaš akkordat post-garrarocka vuoiŋŋain, punka leavttuin ja vuogas juoigamiin masa vel gadja lea lasihuvvon.
Erle Bårdsdatter Sæther, IDJA - Sámi Club Night stivrajođiheaddji, lea ilus almmuhusas:
Mun ja oallugat stivrras leat bargan Ridduin ollu jagiid ja mu mielas lea dá dehálaš deaivvadanbáiki sápmelaččaide sihke Sámis ja dan olggobealde. Munnje lea dát leamaš erenomáš dehálaš áŋgirušadettiinan sámi servvodagas ja servvodahkii. Danin lean hui ilus go IDJA- Sámi Club Night galgá ovttasbargat Ridduin ja go oažžut leat Club Lávvu miellágideaddjit! Illudan dánsumii ja moktii, ja dieđán dát šaddá vásihan veara!
Lihput Riddu Riđđu festivála 2023 várás leat dál fidnemassii dás: riddu.no. Ovdal lea Festivála dieđihan ahte čuovvovaččat servet prográmmii: Ana Tijoux, Rolffa, Go_A, Katarina Barruk, Lávre Stand-up: Isalill Kolpus, Hildá & Tuomas, Hva er det som spiser meg om natten, Small time giants, Manne ja 7 % samisk nammasaš čájálmas.