Sajje Solbakk šaddá Riddu Riđđu ođđa festiválajođiheaddji
Riddu Riđđu lea virgádan Sajje Solbakk (24) ođđa festiválajođiheaddjin. Son loaiddasta njealji jagi mearreáigái Gáivuona eamiálbmotfestiválii.
Sajje Solbakk bargá dál journalistan NRK Sámis, gos lea bargan earet eará Valvi rádiosáddagiin ja ovdánahttinbargguin. Solbakk lea Biertaváris eret ja lea guhká leamaš oassin Riddu Riđđus, earet eará prošeaktadoaimmaheaddjin festivála lágideaddjeprográmmas nuoraide, Bargi Nuorat. Solbakk lei Oslove Noereh nubbi jođiheaddji ja miellahttu stivrras organisašuvnna álggaheami rájes. Solbakk hupmá davvisámegiela ja sus lea buolli beroštupmi sámegillii ja sámi kultuvrii.
“Riddu Riđđus lea álo leamašan stuora sadji váimmustan, ja dieđán lean guhkkin eret akto dovdamis nu. Festiválas lea leamašan áibbas erenoamáš mearkkašupmi guovllu mearrasápmelaččaide ja lea šaddan okta máilmmi deháleamos gávnnadanbáikin eamiálbmogiidda. Riddu Riđđu ii leat duššo festivála, muhto olles sierra máilbmi eamiálbmotkultuvrraide, dáidagii, musihkkii ja servvodatdigaštallamiidda. Oažžut luohttámuša jođihit festivála ja joatkit ovdánahttit dán máilmmi fárrolaga rámálmas bargiidjoavkkuin ja buot eaktodáhtolaš bargiiguin lea stuora niehku mii ollašuvvá.” dadjá Sajje Solbakk.
Stivrajođiheaddji Bente Ovedie Skogvang lea hui duhtavaš virgádemiin: “Sajje Solbakkiin oažžut áŋgiris festiválajođiheaddji geas lea stuora váibmu mearrasámi kultuvrii. Solbakk lea nuorra ja movttiidahtti jođiheaddjeávnnas gii lea čeahppi oažžut earáid fárrosis ja geas lea ollu gelbbolašvuohta sihke sámi ja eamiálbmotjearaldagain. Su beroštupmi ja gelddolaš gelbbolašvuohta dahká su rievttes olmmožin doalvut Riddu Riđđu viidáseappot mearrasámi ofelažžan.”
Sajje Solbakk álgá bargui geassemánus ja lea oahpahusas heaiti jođiheddjiin Sandra Márjá Westiin geasi festiválas, ovdalgo ieš váldá badjelasas dáiddalaš jođiheami čakčamánu 1.b. 2022 rájes.