Riikkaidgaskasaš psyhkalaš dearvvašvuođa beaivvi čalmmusteapmi Olmmáivákkis
Riddu Riđđu Festivála, Davvi álbmogiid guovddáš ja Gáivuona suohkan bovde riikkaidgaskasaš psyhkalaš dearvvašvuođa beaivvi čalmmusteapmái golggotmánu 10.b. Prográmmas lea filbmavuosehus, panelaságastallan ja nuoraidkonsearta artisttain Lávre. Lágideapmi lea nuvttá.
Vuosttáščájálmas Olmmáivákkis
Vuosttáš háve galgá Liselotte Wajstedt filbma “Jaskatvuohta Sámis” čájehuvvot Olmmáivákkis. Filbma lea vuoitán ollu bálkkašumiid, ja árvvoštalliid mielde lea filbma “deháleamos sámi dokumentárafilbma mii lea ráhkaduvvon.” (Anne Lajla Utsi, direktevra ISFI).
Jávohisvuohta sámis lea seksuála illasteami, psyhkalaš dearvvašvuođa ja jávohisvuođa kultuvrra birra Sámis. Filbma gieđahallá tabuáššiid ja dáhpáhusaid mat guhká leat givssidan ollu nuorra sápmelaččaid – buolvvaid mielde. Seksuála illasteapmi ii leat dušše sámi fenomena, lea oppamáilmmálaš ja guoská buohkaide. Jávohisvuohta lea guhká leamašan birgenstrategiija ollu álgoálbmotservvodagain. Nuorra nisson guovttos Marion ja Ida geat filmmas muitaleaba iežaska vásáhusaid birra, leaba vásihan ahte jávohisvuohta ii leat oktiige ávkin. Filbma vuosehuvvo Davvi álbmogiid guovddážis, ja lea ahkemearri 15 jagi.
Maŋŋel filmma bovdet lágideaddjit panelaságastallamii mas fáttá lea jávohisvuohta sámis. Panelas leat festiválajođiheaddji Sajje Solbakk, artista Lávre Johan Eira, suohkanpsykologa Kristin Aagaard, Lene Sivertsen, SMISO Troms jođiheaddji, ja filmma mielváikkuheaddji Marion Anne Rimpi.
Artista Lávre Gáivuona erenoamážeamos lávddis
Artista Lávre Johan Eira eret Guovdageainnus lea čuojahan dronnet Sonja ovddas Venezias, dál boahtá Olmmáivággái ráhkadit magihkalaš mielladili riikkaidgaskasaš psyhkalaš dearvvašvuođa beaivvi čalmmusteami oktavuođas. Vaikko juoigamis lea nana sadji musihkas, de geavahuvvot seammás universála ja ođđaáigásaš hutkandoahpagat. Konsearta lea rabas buohkaide ja lágiuvvo Nisga'a viesus Riddu giettis.
Prográmma
Bie. 17:30 Gáfedat lea rabas
Bie. 18:00 Filbmavuosehus: Jaskatvuohta Sámis (15 jagi ahkerádji)
Bie. 19:15 panelaságastallan “Manne fertet botket jaskatvuođa?” Marion Anne Rimpi, Lávre Johan Eira, Kristin Aagaard, Sajje Solbakk ja SMISO
Bie. 20:30 Lávre lágida konseartta