Ridduveterána álgá festiválabuvttadeaddjin
Astrid Solhaug lei vuosttamuččaid siste festiválahoavdan Riddu Riđđus jagiid 2000 - 2001. Dál son máhccá ruovttoluotta, ja dál son lea ovddasvástideaddjin jagi 2015 buvttadeamis.
- Mii leat buohkat hui duhtavaččat, go leat ožžon eakti ridduveterána buvttadanbargui jahkái 2015. Astrid Solhaug lea leamaš deaŧalaš olmmoš Rittu historjjás ja sus lea olu čehppodat ja hárjáneapmi, mii dahká su hui heivvolažžan dán bargui. Munnje lea illu bargagoahtit ovttas suinna ja buot eará bargiiguin, dadjá festiválahoavda Karoline Tveitnes Trollvik. Astrid Solhaug lea jagi 2009 rájes jođihan Gáivuona giellaguovddáža ja lea máŋggaid jagiid áigge bargan giela ja kultuvrra buorrin dán guovllus. Solhaug lea Olmmáivákkis eret ja son lea dárkilit čuvvon festivála, vaikko leatge jagit gollan dan rájes go ieš barggai hoavdan. Ieš Solhaug dadjá ođđa barggus birra «Munnje lea stuorra illu álgit dien bargui, ja lean fas gárvvis bidjat olu searaid Riddu Riđđui. Festivála lea sturron ja šaddan hirbmat deaŧalaš arenan guovllu sámi kultuvrii» .
Solhaug lea ovtta jagi sadjásažžan Rita Miennai, geas lea virgelohpi skábmamánu 1. beaivve rájes.
Riddu Riđđu festivála lágiduvvo suoidnemánus 2015 24. geardde.