Riddu Riđđu rohtte ávvujagi johtui
Riddu Riđđu Festivála álggaha ávvujagi kick-offain Romssas bearjadaga miessemánu 7. b. Dii. 17 rájes sáhttet áŋgiris guossit máisttašit dán jagáš prográmma ja festiválafálu. Seammás almmuha festivála máŋga artistta mat leat festiválaprográmmas.
Riddu Riđđu giktá gussiid prográmmain mas lea čielga sámi sisdoallu. Otná artistaalmmuheamis leat: Kajsa Balto, OZAS, Elin & the Woods, Bats of Congress, Article 3, ja DJ iDJa ÅVLAin ja Ramona Linneain. Riikkaidgaskasaš eamiálbmotfestivála Riddu Riđđu ávvuda 30 jagi dán geasi. Festivála lea leamaš - ja lea ain - dehálaš sámi deaivvadanbáiki ja sámi dáidaga njunuš.
-"Mii leat rámis iežamet prográmmain ja leat dahkan nu bures go lea vejolaš áiggis mas leat ollu gáržžideamit. Prográmmasisdoallu lea válmmas, muhto mii ain vuordit Ráđđehusa muitalit midjiide man galles mii sáhttit leat go čoahkkanat dán geasi. Vaikke mo de leaš, de šaddá Riddu Riđđu, go leažžat mii dal 200 vai 2000 olbmo, de lea stuorra árvu beassat gávnnadit," dadjá festiválajođiheaddji Sandra Márjá West.
Romssajoavku, vai galgatgo baicce dadjat Gáivuonjoavku, Bats of Congress ovdanbuktet julki ritmmaid mat irggástallet guđalotlogu roavavuođain. Lávlu, Tone, báitá šođbes seaguhussan dološáiggi Hollywood-glamouras ja min buolvva soahpameahttun rockaikonain.
Sámi artista Elin Kåven ja lávllačálli/musihkkabuvttadeaddji Robin Mortensen Lynch álggaheigga musihkalaš ovttasbargguska Elin & the Woods jagis 2015. Dán gelddolaš duo musihkka lea doalvvuheaddji seaguhus elektrovnnalaš musihkas mas leat lossa ritmmat ja juoigan.
Eamifápmu deaivvada ođđaáiggiin Kajsa Balto áibbas iešlágán musihkalaš dovddasteamis, mas juoigan ja davvisámegielat teavsttat ovdanbuktojit popmusihkalaš jietnagovas. «Buot eallá» álbuma luitojuvvui jagi 2020 miessemánus, ja oaččui mearehis buriid árvvoštallamiid norgga bealde.
OZAS lea Sara Marielle Gaup ja Risten Anine musihkalaš ovttasbargu. Giella, juoigan ja duddjon lea nana vuođđun sudno jurddašeapmái ja musihkii. Sudnos lea čiekŋalis áŋgiruššan Sámi servvodaga boahtteáigái.
Article 3 lea sámi dj-kollektiiva mii čuojaha sáme- ja eamiálbmotmusihka mii boahtá miehtá máilmmi. DJ-kollektiivas leat Christina Hætta, Elle Márjá Eira, Sunna Nousuniemi, Alice Jektevik ja Anne Henriette Nilut.
DJ iDJa lea beakkihan DJ:n Sámis maŋemus jagiid. Beroštumiinis elektrovnnalaš dánsunmusihkkii ovttasta son urban electronica juoigamiin. Fárustis leat sus badjáneaddji máttasámi artisttat ÅVLA ja Ramona Linnea.
Riddu Riđđu lea jo almmuhan ahte ISÁK, Felgen Orkester, Katarina Barruk, Gájanas, Ailu Valle ja Amoc, ja Emil Kárlsen ja Lávre ja ustibat bohtet.
Dán muttos áiggi láve Riddu Riđđu dábálaččat almmuhit olles prográmma masa buot diibmomearit leat biddjon, muhto festivála vuordá dahkamis dan dassá Ráđđehus miessemánu 12. b. lea cealkán makkár láidestusat gustot festiválageassái.