Riddu Riđđu nuorra dáiddár 2021

Jagi nuorra dáiddárat 2021 leaba nuorra dánsejeaddjit Biret Haarla ja Gáddjá Haarla, Dálvadasas eret Deanuleagis. Soai leaba 21 jagi ja lohkaba dánsuma P.A.R.T.S. (Performing Arts Research and Training Studios) ásahusas Brüsselis. Ovdal leaba viežžan oahpu baleahttaskuvllas Helssegis ja leaba leamaš fárus moanat dáiddaprošeavttain ovttas Marja Helanderiin, Pauliina Feodoroffiin ja Outi Pieskiin.

Dánsumis guorahallaba fáttáid nugo sámi gullevašvuođa, movt historjámet ja eallinvuohkámet čuohcá rupmašasamet ja olbmo oktavuhtii eatnamiin. Maŋemus fáddá šattai erenoamáš áigeguovdilin dallego Biret ja Gáddjá jagis 2019 searvvaiga dálkkádatkonferánsii Madridas ovttas eará eamiálbmogiiguin. 

Haarla-oappážagat háliideaba joatkit guorahallat dánsuma sámi geahčastagain ja ásahišgoahtit dánsunčájáhusa ovttas sámi musihkkariiguin. 

Gáddjá Haarla mielas lea nammadeapmi gelddolaš ja dadjá: “Lean ilus ahte moai Birehiin letne dán jagi nuorra dáiddárat! Munnje dat mearkkaša eandalit ge dan ahte beassá návddašit musihkas ja dánsumis Sámis. Dát lea fiinna vejolašvuohta!”

Biret Haarla dadjá: “Munnje Riddu Riđđu nuorra dáiddár mearkkaša hirbmat ollu danin go beassat čájehit main áššiin letne buđaldan diibmá. Orru ahte dán bokte dovddan nannoseabbo oktavuođa Sápmái.”

Festiválajođiheaddji Sandra Márjá West lea čeavlái go beassá nammadit Jagi nuorra dáiddára: “Biret ja Gáddjá leaba issoras gelddolaš dáiddárat, geat leaba ollu doaimmahan vaikko leaba nuorat. Sudnos lea nanu čanastat Sápmái, muhto geahčastat ovddasguvlui. Sámi dánsundáidda lea ain ovdáneame ja Biret ja Gáddjá ovddasteaba boahtteáiggi sámi dánsundáidaga.”

Dát lea vuosttaš jahki go guokte dáiddára juohkiba Jagi nuorra dáiddár-nammadeami. 

Jagi nuorra dáiddár lea ortnet mii juohke jagi nammada nuorra sámi dáiddára ovdanbuktit dáiddalašvuođas Riddu Riđđu festiválaprográmma bokte ja eará lágidemiin maid Riddu Riđđu lea fárus lágideame dan jagi. Nammadeapmi addá, lassin 25.000 ruvdnosaš stipendii, vejolašvuođa orodit Lásságámmis, Áillohačča dáiddárviesus. Biret ja Gáddjá Haarla álggaheaba dáiddajagiska Riddu Riđđu festiválas, ja joatkiba dien doaimma Emil Kárlsena maŋis.

Dán jagi nuorra dáiddár/Riddu Sessions-prográmma čađahuvvo Talent Norge, Samfunnsløftet ja Sámedikki doarjagin