Riddu Riđđu lea nammadan dán jagáš nuorra sápmelaš dáiddára
Riddu Riđđu Festivála lágida nuorra sápmelaš dáiddáriidda vejolašvuođa ovdánit sin dáiddalaš čehppodagas ja dahká sin dovddusin riikka siste ja olgoriikkain. Oktasaš barggus Kulturnæringsstiftelsen SpareBank 1 Nord-Norge- kulturealáhusfoanddain mii juohkit nuorra dáiddárii stipeandda 25 000 ruvnnu.
23- jahkásaš Elina Waage Mikalsen lea válljejuvvon Riddu Riđđu dán jagáš nuorra dáiddárin. Son lea Romssas eret ja sus leat mearrasápmelaš ruohttasat Gáivuonas. Mikalsen vázzá vuosttas jagi Nordland dáidda- ja filbmafágaskuvlla Kabelvågas, ja geahččaladdá dáiddafilmma, skulptuvrraid, sárguma, teavsttaid ja maid jietna-/ videoinstallašuvnnaid. Waage Mikalsen berošta birassuodjaleamis, feminismmas, skuvllas ja das mo lea eallit sápmelažžan Norggas.
«Lea stuorra gudni munnje go lean válljejuvvon jagi nuorra dáiddárin. Dát lea áidnalunddot vejolašvuohta ovddidit mu dáidaga ja olahit dainna stuorát olmmošjoavkkuide, in mun muđui livččii ollet oidnosii. Mun leamašan Riddu Riđđus unnivuođa rájes ja illudan go beasan čájehit dujiidan stuorra jovkui. Lea nu hirbmat suohtas dahkat dan dáppe mu váhnemiid ruovttu gilis.” dadjá Waage Mikalsen. Stipeandda son áigu atnit dáiddaprošektii mainna dutká dakkár temáid main lea dahkamuš gielain ja identitehtain sámiid kultuvrras.
Jagi nuorra dáiddára áigut oahpásmahttit albma láhkái dán jagáš festiválas. Dáiddár oažžu earret eará iežas prográmmaoasi, masa son ieš beassá válljet málle ja čájehanhámi. «Elina lea jur dakkár maid mii vuordit jagi sápmelaš nuorra čeahpis. Son dahká dáidaga, mii vásihuvvo leat modearna seammá áigge go dat stuorra oasis oažžu fámu mearrasápmelaččaid kultuvrras ja historjjás» dadjá festiválahoavda Karoline Trollvik