Resirkulert maŋimuš geardde Riddu Riđus
Bálkkašuvvon joavku, ruohttasat Omasvuonas, dovddus dánsafeasttat main bivastat golgá ja energiijadássi lea dáhkis! Maŋŋel 10 jagi gehččiid ja festiválagussiid oiddohin vuolgá poprockjoavku Resirkulert maŋimuš turnéai jagis 2023. Riddu Riđu festiválaguossit besset illudit beaškkaslágan musikálalaš ávvudeapmái Olmmáivákkis suoidnemánus 2023.
Vuosttas konsearta Resirkulert namain lei UKM:s (Nuoraid kulturdeaivvadeamis) iežaset siidasuohkanis, Omasvuonas. Dan maŋŋá sii leat čuojahan konsearttaid stuorit ja unnit festiválain miehtá Norgga. Joavku sáhttá rábmot maid soames TV-loaiddastemiin NRK:s, ja dainna go leat ožžon lávlagiid listejuvvot NRK Rádios.
Joavkku miellahtut leat molsašuddan jagiid mielde, muhto guokte omasvuotnalačča leaba leamaš mielde álggu rájes: vokalista Emil ja gitarista Johan. Go soai de vuolgiba maŋimuš turnéai de galget buohkat geat goas nu leat leamaš joavkkus mielde čoahkkanit muhtun válljejuvvon konsearttaide.
Emil Karlsen nammaduvvui Jagi nuorra dáiddárin Riddu Riđđu Festiválas i 2019, ja beasai dan maŋŋá leat mielde Riddu Sessions’as mii lea festivála iežas prográmma nuorra sámi dáiddáriidda. Son lea maid dovddus go duddjo magiija iežas attáldagainis ja musikalitehtain, ja sáhttá ge vuordit liekkus vuostáiváldima Riddugussiin.
Riddu Riđu festiválajođiheaddji Sajje Solbakk lea rámis go sáhttá almmuhit Resirkulert-joavkku Riddu Riđđui:
- Resirkulert lea stuorra oiddot min gehččiid gaskkas, ja leatge ilus dainna go Lávdi šaddá oktan bisánastinbáikin sin maŋimuš turnéas. Mii vuordit dánsema ja melankoliija vuogas seaguhussan – oktan guosseloaiddasteddjiiguin ja showain man Olmmáivággi ii buoril vajálduhte!
Ovddežis leat dát artisttat nannejuvvon Riddu Riđđu Festiválii 2023: Katarina Barruk, ja Herman Rundberga fámolaš soloprošeakta, Manne. Festiválas lea maid prográmma olles bearrašii, ja lágiduvvo Gáivuonas, Davvi-Romssas juohke jagi. Beaivemearri boahtte jagi festiválii lea suoidnemánu 12.-16. b. 2023. Bileahtat leat dál vuovdimassii festivála neahttasiiddus.