Ovttas ráhkadit luonddugáhttejeaddji álgoálbmotfestivála
Vårt Hav Troms ja Finnmárkku/Naturvernforbundet Romssas ja Finnmárkkus, doarjagin Senter mot marin forsøpling almmuhit ovttasbarggu Riddu Riđuin, Eurohpa stuorámus álgoálbmotfestiválain. Vårt Hav lea Naturvernforbundet Romssa ja Finnmárkku prošeakta mearranuoskkideami vuostá, ja sii lágidit eaktodáhtolaš mearragáttečorgema miehtá fylkka. Vårt hav galgá dál veahkehit festivála birasbargguin sihke diehtojuohkimin ja máŋggain birasovddidandoaibmabijuin
Jus guođát eatnan ala, de manná maid merrii!
Ballot bins lea sneipagássat main humoristtalaš olggoš, ja dán geasi Vårt Hav ceggejit máŋggaid Ballot binsaid festiválabáikkis Olmmáivikkis; Galgá šaddat somá bálkestit snuvssaid ja sneipaid gosa gullet – ruskalihttái! Vårt Hav bovdejit maiddái Riddu-gussiid mielde sáttogáddái čorget ruskkaid festivála oktavuođas.
Miljøfyrtårn mii čalmmustahttá mearranuoskkideami
Riddu Riđđu lei okta dain vuosttas festiválain Norggas mii sertifiserejuvvui Miljøfyrtårnan (2004), ja lea máŋgga geardde ovttasbargan dálkkádatorganisašuvnnaiguin festivála oktavuođas. Naturvernforbundet Romssas ja Riddu Riđđu leat ovdal ovttasbargan 2019:s, mas čalmmustahtte mearrasámi kultuvrra luondduvuđđosa. Dán jagi galgá ovttasbargu čalmmustahttit mearranuoskkideami ja plastihka.
Riddu Riđu festiválajođiheaddji, Sajje Solbakk, illuda ovttasbargui;
- Sámi jurddašan- ja eallinvuogis lea lagasvuohta lundui áibba guovddážis. Kulturlágideaddjin Sámis midjiide lea hui dehálaš gáhttet birrasa – sihke báikkálaččat ja riikkaidgaskasaččat, sihke vuoi ráddjet dálkkádatrievdadusaid ja vuoi áimmahuššat olbmuid min birrasis. Mii galgat leat vuolggaheaddjit ja duostat geahččalit ođđa vugiid! Vårt Hav lea hui gelddolaš ovttasbargoguoibmi midjiide, ja mii jáhkkit ahte guossit ge movttáskit birasbargguin seamma olu go mii leat, dadjá festiválajođiheaddji.
Riddu Riđu festiválaguossit leat dovddusin birasdiđolaš olbmuin, ja dán jagáš festiválaguossit sáhttet vuordit buriid ságastallamiid plastihka ja mearranuoskkideami birra. Festiválas lea prográmma olles bearrašii, ja gehččiide lea nuvttá cegget lávu ja tealttá min festiválacampain.