Ovttas čalmmustahttit eamiálbmotjearaldagaid dán jagi filbmafestiválas
Prográmma:
Rahpanseremoniija
Ođđajagimánu 16. b., Stortorvet, dii. 18:00.
Geahččit sáhttet illudit konsearttažis gullat Sámi dronnega, Mari Boine. Rabas buohkaide.
Rahpanfilbma: Ellos eatnu – La elva leve
Ođđajagimánu 16. b., Kulturviesus/Kulturhuset, Sal 1 Fokus, dii. 19:00.
Fikšuvdnafilmma vuođđun leat duohta dáhpáhusat Áltá-akšuvnnas ja sámi vuoigatvuođaid dáistaleamis 70-logu loahpageahčen. Romsalaš Ole Giæver lea rešisseren ja Ella Marie Hætta Isaksenis lea váldorolla. Fuomáš ahte filmma ahkemearri lea 12 jagi. Bileahtaid oastá TIFF ruovttusiiddus.
Lávdeságastallan: “Urfolk og populærkultur - mellom kamp og kunst”
Ođđajagimánu 18. b, Romssa girjerájus, dii. 16:30.
Dán jagi TIFF prográmma čájeha ollu filmmaid mat bohtet davviguovllu eamiálbmotservodagain ja mat leat daid birra. Čalmmustahttet ollu iešguđetlágán fáttáid ja bohtet ollu iešguđetlágán báikkiin. Filmmat leat oassin stuorát tendeanssas eamiálbmogiid kultuvrralaš dovddastemiin. Dán ságastallamis áigot lávdeoasseváldit digaštallat eamiálbmogiid ja populearakultuvrra, identitehta, dehálašvuođa gáibádusa, aktivismma ja oktavuođa eanetlohkoservodagain. Rabas buohkaide. Rávdnjejuvvo TIFF ruovttusiiddus.
Loahpahanriemut
Ođđajagimánu 21. b, Storgata camping, dii. 21:00.
Ávvudit dán jagi filbmafestivála loahpa bovdet ovttas TIFF:n guoimmuhanbonanzai Storgata campingas. Lávdde nalde leat A Million Pineapples, Kinsella, nonne, Tøndra, The Dodge Brothers ja lassin almmustahtto musihkalaš čiegusvuohta ovttasbarggus Rakettnatt festiválain. Bileahtat leat vuovdimassii TIFF ruovttusiiddus.
Sajje Solbakk, Riddu Riđđu festiválajođiheaddji, lea gearggus vahkkui mas ollu dáhpáhuvvá:
- Ovttasbargu Riddu Riđđu ja TIFF gaskkas lea buktán ollu gelddolaš kultuvrralaš vásáhusaid. Dán jagi prográmma iige spiehkas ja mun illudan go oainnán dađistaga eanet sámi ja eará eamiálbmot filbmaprošeavttaid kinoliinnis. Persovnnalaččat illudan erenoamáš ollu oassálastit lávdeságastallamis eamiálbmogiid ja populearakultuvrra birra – dat šaddá gelddolaš ja dehálaš ságastallan!
Olles prográmma ja filbmafestivála bileahttavuovdin lea gávdnamis www.tiff.no.
Riddu Riđđu Festiválas lea prográmma olles bearrašii ja lágiduvvo Gáivuona gielddas, Davvi-Romssas, juohke jagi. Boahtte festivála dáhton lea suoidnemánu 12.-16.b. 2023. Dássážii leat prográmmas artistat nugo Katarina Barruk, Resirkulert, Manne, Herman Rundberga álbmás soloprošeakta. Bileahtat leat vuovdimassii siiddus www.riddu.no.