Ovddit háve go čuččodeigga Riddulávddis leigga nuorat ja aittoálgit, dál máhccaba hárjánan artistan.
Ovddit háve go čuččodeigga Riddulávddis leigga nuorat ja aittoálgit, dál máhccaba hárjánan artistan.
Sámi artistaguovttos Marja Fjellheim Mortensson ja Niillas Holmberg leigga Riddu Riđđu festivála nuorra dáiddárin válljejuvvon jagiide 2014 ja 2010. Dan rájes leaba goappašagat ovdánan ja rievdan hárjánan musihkkarin geat riikaidgaskasaččat leaba beakkihan. Dál aitto máhccabage dohko gos sudno áice ja gos lávdái loaiddasteigga.
Marja Fjellheim Mortenssona oinniimet easka NRK:s juoiggadeame gonágasbára 25-jagi ávvudeamis. Engerdala nieida lea čalmmustahttán máttasámi juoigama. Marja dadjá « Beassat Riddu nuorra dáiddárin attii munnje lávddi man nalde bessen čuožžut ja vejolašvuođa gaskkustit iežan musihka. Riddu Riđđu bokte lean beassan leat oassin sámi musihkkabirrasis ja eamiálbmotbirrasis. Nuorra dáiddárin ožžon dihto mátkkiid ja vásáhusaid mat leat leamašan áibbas erenoamážat. Deaivvadeamit iešguđetlágán kultuvrraiguin leat addán munnje movtta ja inspirášuvnna joatkkit jiellat bargguinan. »
Multidáiddár Niillas Holmberg lei Riddu Riđđu nuorra dáiddár jagi 2010:s ja lea ožžon gutni ja rámi sihke musihkas ja lyrihkas dihte. Geassái lea Riddu bivdán dáiddára máhccat fas ruovttoluotta, oassin YLVA nammásaš elektronika-konstellašuvnnas man čoavddasátnin galgá leat sámi aktivisma, earet eará eksklusiiva sámi burlesque čájálmasa bokte.
Niillas dadjá; «Mii vel sáhttá leat buoret vuohki aittoálgi artistii go beassat dovddusin šaddat sámi stuorámus lávddis? Eandalii lea dát mu veahkehan birget dáiddárin. Diet jahki go ledjen Jagi nuorra dáiddár lea ain munnje deháleamos festiválavásáhus obanassiinge! »
Festiválahoavda Karoline Trollvik dadjá; “Lea hirbmat illu go dát artistat fas máhccaba ruovttoluotta! Dat čájeha ahte min áŋgiruššan čalmmustahttit nuorra sámi čehpiid ávkkuha! Sámis leat nu valljit taleantat, dál duođain laská visot surggiin!”
Dál ohcá festivála Jagi nuorra sámi dáiddára jahkái 2016. Riddu Riđđu háliida ohcciid visot dáiddasurggiin. Ovttasbarggus SpareBank 1 Nord-Norge Kulturealáhusvuođđudusain juolludit nuorra dáiddárii 25 000 ruvdnosaš stipeandda. Ohcci ferte leat gaskal 18 – 25 jagi ja ferte dáiddalaš doaimmastis deattuhit sámi čanastumi. Ohcanáigemearri lea njukčamánu 1.b. Eanet dieđuid gávnnat www.riddu.no