Olles máilbmi Sápmái
Dál šaddá ealas Riddu-guolbanis gos muđui láve jaskat dálvet, go riikkaidgaskasaš musihkkasuorgi boahtá guossái oahpásmuvvat sámi kultureallima oavániiguin. Skábmamánu 25.-30.b. lágida Riddu Riđđu riikkaidgaskasaš delegáhttaprográmma fas. Diibmá lágiduvvui maiddái.
Delegáhttaprográmma čađahuvvo dán jagi ovttas Dáiddadáluin/Kautokeino Kunstnerkollektiv. Prográmma álgá Guovdageainnus earet eará lávdedigaštallamiin eamiálbmotdáiddáriid bookema birra ja riikkaidgaskasaš eamiálbmot dáiddafierpmádagaid birra. Sámi dáiddaásahusat galget maiddái presenterejuvvot.
Dan maŋŋel bovde Riddu Riđđu govda prográmmain láveságastallamii, konsertii, logaldallamii ja filbmavuosiheapmái Olmmáivákkis. Maiddái dáppe besset sáttaolbmot buorebut oahpásmuvvat sámi dáiddáriiguin, nugo Emil Kárlseniin ja Timimie Maräkiin lávdeságastallamis ja lávdečájálmasas. Sáttaolbmot leat kulturlágideaddjit earet eará Ruonáeatnamis, Estteeatnamis, Burkina Fasos, Taiwanas ja Kanadas.
Sáttaolbmot ožžot maiddái vejolašvuođa oassálastit doaimmain nugo beanavuodjimis, guolásteamis ja fitnat “Møter - Encounters - Deaivvadit – Kohtaamissii” dáiddačájáhusas Davvi-Romssa Museas.
1 mil riikkaidgaskasaš delegáhttaprográmmii
Skábmamánus 2020:s čielggai ahte Riddu Riđđu Festivála vuostáiváldá 1 miljovnna ruvnna jagis golbma jagi jođihit riikkaidgaskasaš delegáhttaprográmma. Prográmma galgá láhčit dili riikkaidgaskasaš lágideddjiide oahpásmuvvat sámi dáiddaduovdaga doaimmaiguin, ja galgá veahkehit oaččuhit eanet sámi dáiddáriid ja artisttaid máilbmái. 2021 čavčča lágidii Riddu Riđđu vuosttaš delegáhttaprográmmas buori lihkostuvvamiin, Eurohpá, Davvi-Amerihká ja Asia kulturlágideddjiiguin guossin.
Festiválajođiheaddji Sajje Solbakk illuda vuostáiváldit dán jagi sáttaolbmuid:
- Sáttaolbmot besset mátkkoštit ovtta oasis Sámis: Guovdageainnus nannámis gitta riddui ja mearrasámi gillái, Olmmáivággái. Illudit čájehit riikkaidgaskasaš sáttaolbmuide maid Sápmi sáhttá fállat!