Oliva Nilsen lea dán jagáš vuoiti Buošši-bálkkašumis

Duorastaga go Riddu Riđđu festivála rahppui Olmmáivákkis Gáivuonas, de juogaduvvui Buošši bálkkašupmi 2025. Bálkkašumi juogadeapmi lea boađus Riddu Riđđu ja Davvi álbmogiid guovddáža ovttasbarggus ja juolluduvvo olbmuide dahje servviide geat leat áŋgirat bargan čalmmustahttit mearrasámi giela ja kultuvrra. 

Oliva Nilsen guhte lea Olmmáivákkis Gáivuonas eret, lea dán jagáš vuoiti. 

Son lea mánnávuođa rájes doaimmahan sámi dujiin ja biebmoárbevieruin ja rávisolbmon joatká ain dáid bargguiguin, dan dihte juolluduvvo bálkkašupmi sutnje. Son lea earret eará gođđán sámeránuid, čuoldán vuoddagiid, gođđán ja gorron čázehiid. Son lea oasalástan iešguđet dokumentárain ja girjjiin vai beassá ovddidit sámi kultuvrra. Son lea dainna lágiin leamaš dehálaš doarjjaolmmoš ovddidit guovllu árbevieruid ja mearrasámi kultuvrra. Son govviduvvo dego ovdagovva ja dehálaš olmmoš guhte lea stáđđásit bargan ovddidit sámi kultuvrra dáruiduhttima maŋŋá.