Ođđa virgádeapmi - gulahallanovddasvástideaddji
Viimmat sáhttit muitalit ahte mii nannet jovkomet Signe Bertine Birkeland Johnseniin ođđa gulahallanovddasvástideaddjin. Signe ii leat mihkkege amasolbmuid dás Riddu Riđus, son lea oainnat unnivuođa rájes leamašan fárus, ja lea leamašan nuorra bargin, geassebargin ja lea dál easka virgáduvvon bargin! Mii leat hui movttegat go son mieđai álgit, ja illudit dassážii go son šaddá oassin min joavkkus!
Gulahallanovddasvástideaddjin galgá Signe bargat ollu márkanastinstrategiijaiguin ja sisdoallobuvttademiin sosiála mediaide, neahttasiidui, mediaide ja eará kanálaide, ja maid siskkáldas gulahallamiin.
Signes lea leamašan geassebargu min gulahallanbargojoavkkus guokte jagi, ja lea bargan ollu sisdoallobuvttademiin ja eará gulahallamiin ovdal ja maŋŋel festiválačađaheami. Son lea maiddái jagi lohkan sámegiela UiT:s. Mii dovdat su maiddái nuorra áŋgiruššin sihke sámi vuoigatvuođaid ja mearrasámi nuorra geahččanguovllu ealáskahttima ovddas, go son lea maid čállán kronihkaid fáttá birra.
Ieš lohká Signe:
“Šaddá mearehis gelddolaš álgit Riddu Riđđui bargat. Beassat leat mielde festivála viidásit jođiheamis mearkkaša munnje ollu. Mun lean ieš eret Olmmáivákkis ja oažžu dadjat ahte lean bajásšaddan Riddu-guolbanis, gos festivála lea leamašan dehálaš arenan nannet mu ipmárdusa das man dehálaš searvevuohta ja eamiálbmogiid rahčamušat leat. Mun illudan álgit bargat ja beassat leat mielde viidáseappo ovdánahttime dakkár dehálaš festivála go Riddu Riđu. Lea maid hávski beassat fárret ruoktot Gáivutnii!"
Festiválajođiheaddji, Sajje Solbakk, lea ilus ođđa virgádemiin:
“Lea hirbmat illu sávvat Signii bures boahtima dán rollii. Son lea bajásšaddan Riddu Riđuin ja dovdá festivála siskkil. Signes lea sihke viiddis hárjáneapmi festiválas ja duohta beroštupmi sámegillii, sámi kultuvrii ja nuoraidperspektiivii. Mii leat rámis oažžut su jovkui!”
Signe álgá gulahallanovddasvástideaddjevirgái cuoŋománu 1. beaivvi ja beassá dasto lea fárus eanaš festivála ráhkkanandoaimmain. Váldet su bures vuostá!
