Ođđa nástebooken Riddu Riđđui
Bileahttavuovdin boahtte jagi Riddu Riđđu festiválii lea olles jođus ja vuosttaš 100 festiválapássa vuovdit hálbbiduvvon haddái. Dál lea čielgan ahte gehččiidjiellat ISÁK máhccá Gáivutnii jagi 2022 Riddu Riđđui.
ISÁK joavku luittii nuppi studioálbmuma “Roasut” ođđajagimánus dán jagi ja guossohedje bávki konseartta festivála Riddu Nuorat nuoraidprográmma oasseváldiide jagis 2021. Boahtte geasi máhccá bivnnuhis trio Gáivutnii, gergosat addit Riddugussiide šovva maid eai jur dakkaviđe vajálduhte. Beaggán leage ahte ISÁK addá lávdeovdanbuktima mii lea buoremus luohkás ja mas lea ravddahis energiijadássi. Musihkka ovttasta juoigama ja urbána syntha lyrihkalaš sáttasániin mii gaskkustuvvo sihke sáme- ja eŋgelasgillii.
Festiválajođiheaddji Sandra Márjá West illuda almmuheami olis:
“ISÁK lea Sámi árjjáleamos musihkkajoavku. Sii ovddastit musihka ja sáttasáni mii oalát guorrasa Riddu Riđđu árvvuide ja mun illudan vuot ain dánsut Ridduguolbanis.”
Artisttat mat jo leat almmuhuvvon boahtte jagi festiválii leat: Lido Pimienta, Elin & the Woods, Katarina Barruk, Ailu Valle + Amoc. Ođđasat jagi 2022 festiválaprográmma birra almmustahttojit dađistaga dás: www.riddu.no.
FUOM! Ovdagihtii oston bileahtat refunderejuvvojit jus festivála ii šatta.