
Ođđa festiválabuvttadeaddji Riddu Riđđu festiválas
Mii leat ilus go beassat muitalit ahte leat nannen bargojovkomet Ann Cecilie Hættain, ođđa festiválabuvttadeddjiin. Ann Cecilie lea ođđa olmmoš Riddu Riđus ja mii leat hui movttegat og su leat ožžon searvái!
Festiválabuvttadeaddjin Ann Cecilie šaddá dehálaš olmmoš festivála prográmma plánemis ja čađaheamis.
Sus lea kulturprošeaktajođiheaddji oahppu Høgskolen i Innlandetis ja fitnodatekonomiija UiT:s, ja lea ovdal bargan Dølajazz ja Norsk litteraturfestivalas. Son boahtá Riddu Riđđui Sámedikkis virggis mas lea bargan rekrutteret sámegielat studeanttaid alit ohppui.
Ann Cecilie dadjá:
“Dovddan alddán hui lihku go beasan leat oassin Riddu Riđđu joavkkus. Go lean bajásšaddan Ráissas, de lean oassálastán festiválas measta juohke geasi ja festivála lea šaddan munnje dehálaš deaivvadanbáikin. Báiki gos lean beassan deaivvadit earáiguin ja dovdat searvevuođa dovddu. Mearkkaša hui ollu go dál beasan veahkkin fievrridit viidásit dán sámi- ja eamiálbmotkultuvrra erenoamáš arena. Mun illudan hirbmosit bargagoahtit buvttadeaddjin ja ráhkadit nanu ja mearkkašahtti vásáhusaid ovttas bargojoavkkuin. ”
Festiválajođiheaddji, Sajje Solbakk, lea hui duhtavaš nammademiin:
“Ann Cecilies mii oažžut hárjánan festiválabargi, guhte šaddá hui árvvolaš lasáhussan Riddu jovkui. Ja ii unnimus, midjiide lea illu oažžut vel ovtta sámegielat bargi festiválii!”
Ann Cecilie álgá virgái festiválabuvttadeaddjin suoidnemánu 1. beaivvi, ja beassá nu leat mielde dán jagi festiválas. Mii leat hui ilus dainna. Sávvot bures boahtima sutnje!