Ođđa beaivválaš jođiheaddji Riddu Riđđu festiválas
Henrik Olsen lea virgáduvvon beaivválaš jođiheaddjin Riddu Riđđu riikkaidgaskasaš álgoálbmotfestiválii. Olsen boahtá festiválii seniorráđđeaddi virggis Davvi Álbmogiid Guovddážis/ Senter for nordlige folk. Son váldá badjelasas virggi maŋŋá Frode Haugstvedt Henriksena.
Henrik Olsen oažžu beaivválaš jođiheaddji virggis ovddasvástádusa festivála beaivválaš doibmii ja hálddahussii, ja festivála organisašuvnna ja ekonomalaš rámmaeavttuid viidáseappot ovddideapmái.
Henrik Olsenis lea guhkes historjá Riddu Riđus, ja lea earret eará ovdal bargan festivála beaivválaš jođiheaddjin ja buvttadeaddjin áigodagas 2001 - 2009.
"Mun illudan álgit Riddu Riđu beaivválaš jođiheaddjibargui. Máŋgga dáfus orun dego fas máhccame ruoktot. Festivála lea háhkan áibbas erenoamáš sajádaga máilmmi deaŧaleamos eamiálbmotlávddiid gaskkas, ja lea gelddolaš leat mielde hálddašeamen ja viidáseappot ovddideamen festiválaorganisašuvnna" dadjá Olsen.
Riddu Riđđu Festivála AS stivrajođiheaddji, Bente Ovedie Skogvang lea ilus go oažžu Olsena mielde bargui:
"Henrik Olsenis ii leat dušše guhkes hárjáneapmi Riddu Riđus, sus lea maiddái ollu vásihus barggustis Sámediggeráđđin ja min dehálaš ovttasbargoásahusas Davvi álbmogiid guovddážis. Henrikas lea viiddis fierpmádat ja ollu bargonávccat, mii eahpitkeahttá boahtá buorrin festiválii. Mii illudit hui sakka oažžut Henrik fárrui!"
Olsen álgá virgái beaivválaš jođiheaddjin geassemánu 15. b