Oarjilsámi juoigan Taiwanis
Riddu Riđđu váldá Marja Helena Fjellheim Mortenssona riikkaidgaskasaš musihkkafestiválii Taiwanii.
Dán jagi Riddu Riđđu festiválii searvvai oarjilsámi juoigi Marja Helena Fjellheim Mortensson, Engerdálas eret, Riddu Riđđu festivála ”Dán jagi nuorra dáiddár”. Go Mortensson lávllui, de son bovttii olbmuid beroštumi nugo son dagai iežas láhttenvugiinge. Su lávlagat gieđahallet olbmo lagašvuođa lundui, boraspireváttisvuođaid ja doaru boazoealáhusa ja sámegiela ovddas.
Dál son lea diŋgojuvvon searvat Migration Music Festival nammasaš festiválii mii lea jahkásaš dáhpáhus Taiwánas golggotmánus, ja mii lágiduvvo Taipei-gávpogii. Ieš Mortensson dadjá ná: « dát lea mátki masa fertejin dadjat "jo". Buorre lea beassat vásihit Taiwána ja dan kultuvrra, ja vel čájehit iežan kultuvrra.»
Dán jagi Migration prográmma čalmmustahttá muitalanárbevieruid ja váldá erenoamážit mánáid vuhtii. Mortensson galgá ovttas dovddus álgoálbmotlávluin, mat leat sihke Taiwánas ja olgoriikkas eret, buktit ovdan Taiwána guldaleaddjiide lávlagiid ja musihka nugo dat lea gaskaoapmin álgoálbmogiid gaskkas.
Mongolalaš Urna Chahar-Tugch ja Taiwána iežas Inka Mbing, gii gullá sullo Tayal nammasaš álgoálbmotjovkui, leat namat mat maiddái leat pláhkáhis. Artisttain lea dat oktasašvuohta, ahte sii buohkat geavahit unnitlohkogiela iežaset musihkas. Mortensson juoigá oarjilsámegillii, mii lea garrasit áitojuvvon giella ja maid dušše hárve olbmot máhttet. Iluin Riddu Riđđu buktá ovdan Mortenssona musihkka Taiwána guldaleaddjiide.