Mongolalaš supernásttit Riddu Riđđui
Nu go vierru jo leage de galgá fas čottalávlla skádjat Gáivuona váriid gaskkas go Riddu Riđđu bovdesta festiválii.
Rámiduvvon kiinnálaš-mongolalaš musihkkajoavku Hanggai lea deaivan guldaleddjiid váimmu guovdu festiválain miehtá máilmmi dan rájes go luite vuosttaš skearruset jagis 2008. Vaikko lávlagat, lávlunvuohki ja čuojanasat leat čađa árbevirolaččat, ja vaikko heastašnjirgun dássedit gullosta, de lea sin musihkas maiddái ođđaáigásaš jietnagovva.
Festiválajođiheaddji Karoline Trollvik dadjá: «Dát dáidá šaddat okta festivála buoremus bottuin! Hanggaia musihkka lea hearvás seaguhus árbevirolaš mongolalaš musihkas ja rockas. Dát bártnit fállet lávdešovva mii heive juohkehažžii!»
Jagis 2015 vuittii Hanggai «Sing my song» mii lea kiinnálaš veršuvdna «The Voice» taleantagilvvus, ja easka sii leatge beakkihan maŋŋil dan. Ođđa skearru áigu joavku almmuhit 2016 giđa.
Festiválajođiheaddji loahpaha vel lohpádusain festiválagussiide; «Ridduguolban galgá daimaidit go Hanggai heastaoaivefidjoliiguin, elgitáraiguin ja nanu jienaiguin juovzugohtet lávddi nalde. Vásáhus maid it jur ovttatmano vajálduhte!»