Mii ohcat min ođđa festiválahoavdda
Riddu Riđđu festivála lea riikkaidgaskasaš álgoálbmotfestivála mii jahkásaččat lágiduvvo Gáivuonas Davvi-Romssas Norggas. Riddu Riđđu lea go 30 jagis huksen nana dihtomielalašvuođa sámi kultuvrra hárrái. Dađistaga lea festivála sturron ja lea arvá stuora oassi sámi kulturealáskahttimis mearrasámi guovlluin. Riddu Riđđu Festivála AS (RRFAS) vuođđuduvui guovvamánu 2010’s. Festivála lea dáiddalaččat njunnošis sámiid ja álgoálbmogiid dáidda- ja kulturovdanbuktimis. Festiválas leat prográmmas fálaldagat olles bearrašii ja lea fátmmastahtti, hutkái, diehtomielalaš ja lunddolaš, báikkálaččat ásahuvvon, muhto geahčastat olles máilbmái.
Gelbbolašvuohta
Riddu Riđđu Festivála AS ohcá áŋgiris jođiheaddji geas leat ambišuvnnat, jođihit festivála dáiddalaš barggu jagi čađa, mas jagi stuorámus dáhpáhus lea festivála mii bistá vahku gaskamutto suoidnemánu. Festivála lea vuođđuduvvon eaktodáhtolaš bargguide, ja máhttu inspireret ja vuolggahit beroštumi ja ovttasbarggu leat dehálaš iešvuođat jođiheaddjis. Olbmos gean ohcat bargui lea alit oahppu ja jođihanhárjáneapmi. Lea ovdamunni jus dovdá Riddu Riđđu doaimma. Heivvolaš hárjáneapmi sáhttá buhttet formála oahpu. Virgi lea 4 jahkasaš mearreáigi.
Min ođđa jođiheaddji ferte bures dovdat sámi kultuvrra ja álgoálbmotkultuvrra. Lea ovdamunni jus máhtát sámegiela. Fertet gulahallat bures sihke njálmmálaččat ja čálalaččat sihke dárogillii ja eŋgelasgillii, ja liikot go lea leaktu ja girjás bargibeaivvit. Persovnnalaš heivvolašvuohta deattuhuvvo.
Festiválahoavda lea seammá dásis go festivála beaivválaš jođiheaddji ja goappašagat raportereba stivrra jođiheaddjái, goabbá ge iežaska suorggi siskkobealde. Virggi kánturbáiki lea Olmmáivákkis.
Barggut
Festiválahoavddas lea dáiddalaš ovddasvástádus Riddu Riđđu Festivála AS birrajagidoaimmas, namalassii:
- Jođihit konseaptta barggu ja dáiddalaš plánema
- Jođihit prográmmabarggu
- Márkanastit ja ovddastit Riddu Riđđu sihke Norggas ja olgoriikkas
- Váldoovddasvástádus jođihit eaktodáhtolaš bargoveaga
- Jođihit čađaheami buot lágidemiin Riddu Riđđu namas, lagas ovttasbargguin festivála buvttadeddjiin, festivála bargoveagain ja hálddahusain muđui
- Čuovvolit strategiijaid máid stivra lea mearridan ja veahkkin beaivválaš jođiheaddjái jođihit ovddasguvlui proseassaid ovttasráđiid hálddahusain, stivrrain ja festiválabargoveagain
- Váldoovddasvástádus čuovvolit ovttasbargoguimmiid
- Profileret Riddu Riđđu oassálastemiin lágidemiin ja servodatdigaštallamis go lea dárbu dahje heivvolaš
- Váldoovddasvástádus doallat oktavuođa ja ovdánahttit fitnodaga kultuvrralaš, politihkalaš ja organisatuvrralaš fierpmádaga Norggas ja olgoriikkas
- Veahkkin beaivválaš jođiheaddjái bargat ohcamiiguin ja gulahallamiin ovttasbargoguimmiiguin ja sponsoriiguin
Riddu Riđđu Festivála lea dynámalaš organisašuvdna, ja ferte dan dihte váldit vuhtii ahte barggut sáhttet rievdat áiggi mielde.
Persovnnalaš iešvuođat
- buorit gulahallan- ja ovttasbargogálggat
- buorre ipmárdus kulturbarggus
- iešheanalaš
- struktuvrralaš
- movttiideaddji
- čeahpes áŋggirdeaddji gii liiko ovttasbargat ja oažžu earáid mielde bargguide
- geabbil
- nákca bargat máŋggabeallásáš doaimmaiguin
Mii fállat:
- Hutkás ja sosiála bargobirrasa
- Máŋggabealálaš ja ulbmitlaš bargguid
- Buriid vejolašvuođaid fágalaš ja persovnnalaš ovdáneapmái
- Buriid penšunortnegiid ja ekonomalaš ovdamuniid Finnmárkku ja Davvi-Romssa doaibmaguovllus
- Kánturbáikki Davvi Álbmogiid guovddážis Olmmáivákkis
- Riggodahtti vejolašvuođa searvat mearrasámi/sámi kultuvrra ovdánahttimii, ja searvat kultuvrralaš vásáhussii mii lea riikkaidgaskasaš álgoálbmotfestivála lágideamis
Ohcanáigemearri: Guovvamánu 1. beaivi 2026.
Álgin: Geassemánu 1. beaivi.
Bálká: šiehtadusa mielde.
Gulahallanolmmoš: Beaivválaš jođiheaddji Henrik Olsen, tlf. 907 75 219 dahje festivalahoavda Sajje Solbakk, tlf. 469 50 573.
Ohcan oktan CV ja referánssaiguin sáddejuvvo: [email protected] / Riddu Riđđu Festivála AS, Senter for nordlige folk, 9144 Samuelsberg.