Manne sámi álbmotbeaivvi Gáivuonas

De lea fas sámi álbmotbeaivi ja Riddu Riđđu bovde bearaškonsertii guldalit álbmotjiellaha, Manne! Ovttas Davvi Álbmogiid Guovddážiin rahpat uvssaid hirbmat ávvudemiide Olmmáivákkis. Konsearta lea oassin govda prográmmas mas lea sisdoallu sihke stuorráide ja unniide. 

Mearrasámi identitehta lea álohii leamaš lunddolaš oassin Hermana dáiddalaš bargguin. Manne prošeavttas son buokčala čiekŋalit iežas duogážii mas ođđa šuoŋat leat ožžon váikkuhusaid árbevirolaš luđiin ja mearrasámi sálmmain ja mat dasto laktojuvvojit oktii ođđaáigásaš musihkalaš eanadahkii.

Festiválajođiheaddji Sajje Solbakk lea vissis ahte konsearta lea Gáivuonahiid miela mielde:

-         Geasset lei Mannes vuosttaš čuojaheapmi  Riddu Riđđus ja hirpmáhuhtti vugiin nagodii son sihke njuorasmahttit guldaleddjiid, ja oažžut sin dánsut – visot ovtta konsearttas. Dát šaddá ultimáhta sámi álbmotbeaivvi ávvudeapmi, ja mii illudit deavdit kulturlanja movttegis gussiiguin!

Konsearta lea Davvi Álbmogiid Guovddáža kulturlanjas, guovvamánu 6. beaivi, dii. 18.00.

Davvi Álbmogiid Guovddáža kafea lea rabas dii 15.00 rájes ja doppe vuvdet gaskabeaiborramuša ja gáhkuid.

Sisabeassan lea nuvttá ja rabas buohkaide.