Mánáidfestivála 2025 diŋgojupmi: Manne ja Mánát

Áibbas sierra diŋgojupmi mánáide! Mii illudit go beassat muitalit ahte dán jagi lea min mánáidfestiválas sierra diŋgojupmi, namalassii Manne ja Mánát, mas lea vuosttaš ovdanbuktin Riddu Riđđu lávddážis Mánáidfestiválas bearjadaga suoidnemánu 11. beaivvi 2025. 

Manne lea šuokŋadahkki ja buvttadeaddji, Herman Rundberga soloprošeakta. Rundberg lea Gáivuonas eret, muhto lea ásaiduvvon Romsii.  Mearrasámi identitehta lea álo leamaš lunddolaš oassin Rundberga dáiddalaš doaimmas. Jagi 2023:s debuterii Manne min váldolávddis stuora lihkostuvvamiin, nu ahte lei lunddolaš ovttasbargat ođđa prošeavttain. 

Diŋgojumi namma lea "Manne ja mánát", mearkkašumiin ””Manne” ja mánát”. 2024 čavčča oaččui Rundberg NOPA  ja Egner-bearraša Kardemonstipeandda, ja dat lea ge vuođđun dán diŋgojupmái mii galgá loahpahuvvot olles skearrun mánáide ja nuoraide. 

Manne muitala ieš ahte sutnje mearkkaša erenoamáš ollu ráhkadit musihka dán ulbmiljovkui, ja olles musihkkaduoji ráhkadit mas lea vuolggasadji mearrasámi luođis, lea hirbmat movttiidahtti. Prošeavttas Manne áigu seailluhit árbevirolašvuođa, muhto maiddái komponeret ođđaáigásaš luođi. Son háliida hástalit cieggan guottuid das ahte ii leat juoiganárbevierru mearrasámi suohkaniin. Sutnje lea dehálaš geavahit mearrasámi luođi, gáhttet dan ja leat mielde ovdánahttimin dan. Son háliida addit dán áiggi mánáide ja nuoraide reaidduid vai besset searvat árjjalaččat sámi musihkkii ja vásihit sámi kultuvrra buriid beliid. 

Lávddis leat Mannes (vokálat/juoigan ja keys) fárus, Inger Márjá Eira, Elina Ijäs (vokálat/juoigan), Magnus Tornensis (rumbbut) ja Sverre Simonsen (streaŋgačuojanasat). 

Mii illudit hirbmosit oaidnit go mánát dánsejit ja juiget ovttas Mannein Riddu Riđus geasset!