Leaika ja duođalašvuohta Riddu Riđđus
Šaddá sihke leaika ja duođalašvuohta Riddu Riđđu festiválas. Reaškkas nammasaš stand-up-lihkostupmi máhccá, oaidnit vuosttaščájálmasa ođđa diŋgojuvvon bihtás mas mayakultuvra ja sámekultuvra gávnnadit, ja festivála čalmmustahttá sámevaši. Riddu Riđđu eamiálbmotfestiválas lea girjás prográmma, juoga guhtiige. Festivála lágiduvvo suoidnemánu 13.-17.b. Gáivuonas, ja das leat dál ollu herskot plakáhtas.
Ođđahutkálaš performance
Mii dáhpáhuvvá go guovttis Sámi njunuš juigiin gávnnadeaba bálkkašumi vuoiti gáhttadánsejeddjiin gii lea Guatemalas eret? Diŋgojuvvon bihttá “Hyl i hælen” lea peformance mas muitalusat vássánáiggis ja dálááiggis čadnojit juoigamii ja dánsumii. Dáiddárat ohcet sullasašvuođaid sámekultuvrra ja mayakultuvrra gaskkas. Sara Marielle Gaup Beaska ja Risten Anine dovdat OZAS joavkkus. Carlos Catun aka Bboy Gatoty lea hip hop-dánsejeaddji Guatemalas eret ja lea ovdal leamaš fárus Vidas Extremasis, teáhterbihtás mii oaččui Hedda-bálkkašumi.
Sámi stand-up
Reaškkas máhccá vuolggasadjásis. Ánte Siri, Isalill Kolpus, Ánne Márjá Guttorm Graven, ja Åse Kathrin Vuolab bohtet cuvccastit albma sámeleaikkaid. Reaškkasis lei vuosttaščájálmas diimmá Riddu Riđđus ja lea dan rájes leamaš Romssas, Guovdageainnus, Leavnnjas ja Álttás. Duopmu lea ovttajienalaš: álbmot dáhttu eanet sámi leaikkastallama! Reaškkas čájehuvvo guovtte geardde Riddu Riđđus.
Gelddolaš seminárat
Sámevašši lea dađi bahábut áigeguovdil fas. Miessemánu 17. beaivve-ráiddus Bådådjos bilkidedje rávisolbmot unna bártnáža. Romssas bilkidedje ja seksuálalaččat loavkašuhtte guokte nuorra nissona gávpogis. Guorahallan sámevaši birra čájeha ahte guovttis viđa nuorra sápmelaččas vásihit bilkideami máŋgga geardde jagis. Dán jagi Nordlys-seminára háliida gávdnat vástádusa dasa movt servvodat galgá bihttit sámevašiin, vai mánát ja nuorat eai báze iehčaneaset.
Eará herskot semináraprográmmas leat UIT-seminára mas sámi oahpaheaddjekriisa lea fáddán, seminára mii digaštallá sámi dáidaga geainnu viidáseappot maŋŋel Veneziabiennala, ja dáiddaságastallan Dán jagi nuorra dáiddáriin, Márjá Karlseniin.
Maŋemus festivála
Dán jagi festivála lea festiválajođiheaddji Sandra Márjá West maŋemus. Sajje Solbakk galgá čuovvut Westa dán jagi festiválas, ja son váldá badjelasas dáiddalaš jođiheami čakčamánu 1.b. rájes.
Beakkálmasat nugo Angelique Kidjo, Lido Pimienta, ISÁK ja The Halluci Nation (gudde ovdal A Tribe Called Red-nama) leat jo almmuhuvvon dán jagi festiválii. Olles prográmma gávnnat dás.